Баргузории нишасти муштараки фаъолони иқтисодии Тоҷикистон ва Эрон

Имрӯз, бо ибтикори Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва Утоқи бозаргонии Ҷумҳурии Исломии Эрон дар доираи сафари давлатии Президенти Ҷумҳурии Исломии Эрон муҳтарам Масъуд Пизишкиён ба Ҷумҳурии Тоҷикистон дар шаҳри Душанбе нишасти муштараки фаъолони иқтисодии Тоҷикистон ва Эрон баргузор карда шуд.

Чорабинии мазкур таҳти роҳбарии Раиси Кумитаи давлатии сармоягузорӣ ва идораи амволи давлатӣ Султон Раҳимзода ва Раиси утоқи бозаргонӣ, саноеъ, маоден ва кишоварзии Ҷумҳурии Исломии Эрон Самад Ҳасанзоде бо иштироки намояндагони вазорату идораҳо, соҳибкорону сармоягузорон ва ширкату корхонаҳои соҳаҳои гуногуни фаъолияти хоҷагидории Тоҷикистону Эрон дар соҳаҳои фарматсевтика, саноат, инфрасохтор, кишоварзӣ, энергетика, хизматрасониҳои молиявӣ ва сайёҳӣ, технологияҳои иттилоотӣ ва дигар соҳаҳо баргузор карда шуд.

Ҷонибҳо вазъи кунунӣ ва дурнамои густариши ҳамкориҳои тиҷоратию иқтисодӣ ва сармоягузории байни Тоҷикистону Эронро мавриди баррасӣ қарор дода, доир ба муҳимияти ҷалби маблағгузорӣ  барои татбиқи лоиҳаҳои инфрасохторӣ, ҳамкориҳои байнибонкӣ, таъсиси фондҳои муштарак, табодули таҷриба дар самти фанновариҳо, инчунин иштироки ширкатҳои эронӣ дар татбиқи лоиҳаҳои афзалиятнок дар Ҷумҳурии Тоҷикистон ба ифоқа расидад.

Дар рафти вохӯрии мазкур байни субъектони бахши хусусии ду давлат як қатор санадҳои нави ҳамкорӣ ба имзо расонида шуд.