Ҷаласаи тантанавӣ бахшида ба ҷашни Рӯзи Модар

Санаи 6уми марти соли ҷорӣ дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон ҷаласаи тантанавӣ бахшида Рӯзи Модар баргузор гардид. 

Дар оғоз раиси Кумитаи давлатии сармоягузорӣ ва идораи амволи давлатӣ Султон Раҳимзода модарон ва бонувонро ба рӯзи Иди Модар табрику муборакбод намуда, қайд намуд, ки бо тантанаву шукӯҳи хосса дар кишвар ҷашн гирифтани Рӯзи модар ин нишонаи эътибору эҳтироми зиёди Ҳукумат нисбат ба модарону занон мебошад, зеро модарону бонувони азизи мо дар амалӣ гардидани ҳадафҳои созандаву бунёдкоронаи кишвар саҳми арзанда гузошта истодаанд.

Зимни суханронӣ аз дастгириҳои Ҳукумати Ҷумҳурии Тоҷикистон, хоса таваҷҷуҳу ғамхориҳои ҳамешагии Асосгузори сулҳу ваҳдати миллӣ - Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар шуда, қайд гардид, ки бо шарофати Истиқлоли давлатӣ ва таҳкими пояҳои давлатдории навин имрӯз занону бонувони мо бо рафтори нек, андешаи солим ва маҳорату кордонии худ дар ободиву пешрафти Тоҷикистони маҳбубамон саҳми бориз доранд.

Аз ҷумла, ба тасвиб расидани фармони Президенти Ҷумҳурии Тоҷикистон “Дар бораи тадбирҳои баланд бардоштани мақоми зан дар ҷомеа” дар рушди ҷомеа ва иштироки фаъолонаи онҳо дар ҳаёти сиёсиву иқтисодии мамлакат заминаи боэътимоди худро гузошт, зеро бунёди ҷомеаи солим, пойдории оилаҳои ҷавон ва тарбияи фарзандони боақлу соҳибмаърифат аз Зан-Модар маншаъ мегирад.

Дар чорабинӣ, ҳамзамон як қатор бонувони фаъоли Кумитаи давлатии сармоягузорӣ ва идораи амволи давлатӣ барои саҳми арзанда ва фаъолияти софдилонаашон бо сипосномаҳо қадрдонӣ карда шуданд.