Русский
English
Дар доираи Конгресси байналмилалии AIM (Annual Investment Meeting), ки бо ҳузури васеи намояндагони ҳукуматҳо, созмонҳои бонуфузи байналмилалӣ ва доираҳои сармоягузорӣ дар шаҳри Абу-Дабӣ баргузор гардид, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Султон Раҳимзода, дар мизи мудаввари сатҳи баланд таҳти унвони «Ҷаҳони нави ҷаҳонишавӣ: Сохтани пулҳо – ташкили сарват» иштирок намуд.
Зимни баромади худ Раиси кумита талошҳои Ҳукумати кишварро ҷиҳати таъмини муҳити мусоиди сармоягузорӣ, рушди инфрасохтор ва татбиқи лоиҳаҳои стратегии миллӣ ба ҷомеаи байналмилалӣ манзур намуда, инчунин таваҷҷуҳи иштирокчиёнро ба имкониятҳои фарохи сармоягузории кишвар ҷалб намуд.
Ҳамчунин, дар ҳошияи ҳамоиш мулоқоти корӣ бо хонуми Нан Ли Коллинз, намояндаи Созмони Милали Муттаҳид оид ба савдо ва рушд, баргузор намуд. Ҷонибҳо зимни мулоқот дурнамо ва самтҳои афзалиятноки ҳамкориҳои дуҷонибаро дар доираи дастгирии рушди устувор, татбиқи барномаҳои муштарак ва ҷалби сармоя ба бахшҳои калидии иқтисодиёти Ҷумҳурии Тоҷикистон мавриди баррасӣ қарор доданд.
Инчунин, Раиси кумита ҳозирин ва иштирокдорони мизи мудавварро барои иштирок дар форуми Душанбе-Инвест 2025, ки моҳи октябр дар шаҳри Душанбе баргузор мегардад, даъват намуд.
Мулоқот дар руҳияи созанда ва ҳамдигарфаҳмӣ гузашта, омодагии ҷонибҳо барои таҳкими минбаъдаи ҳамкорӣ таъкид гардид.
294 