Нишасти кории ҳайати мақомоти давлатии Тоҷикистон ва Эрон бо ҳузури соҳибкорону сармоягузорон

Санаи 18-уми феврал, дар Кумитаи давлатии сармоягузорӣ ва идораи амволи давлатӣ нишасти кории ҳайатҳои расмии Ҷумҳурии Тоҷикистон ва Ҷумҳурии Исломии Эрон бо иштироки доираи васеи соҳибкорону сармоягузорони ду кишвар баргузор гардид.

Дар оғози кори нишаст раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода ва Вазири саноат, маъдан ва тиҷорати Эрон Сайидмуҳаммад Атобак суханронӣ карда, таъкид намуданд, ки Тоҷикистону Эрон дорои имкониятҳои фаровони ҳамкорӣ дар соҳаҳои саноати коркард, энергетика, маъдан, кишоварзӣ, инфрасохтор ва тиҷорати мутақобила мебошанд.

Ҷонибҳо масъалаҳои ҷалби сармояи мустақими хориҷӣ ба иқтисодиёти Тоҷикистон, таъсиси корхонаҳои муштарак, роҳандозии лоиҳаҳои истеҳсолӣ бо истифода аз технологияҳои муосир ва тақвияти содироту воридотро мавриди баррасии муфассал қарор доданд.

Дар нишаст, ҳамзамон аз ҷониби директори генералии КВД “Тоҷинвест”-и Кумитаи давлатии сармоягузорӣ ва идораи амволи давлатӣ Дилшода Ҷуразода имкониятҳо ва лоиҳаҳои афзалиятноки Ҷумҳурии Тоҷикистон муаррифӣ карда шуд.

Инчунин, дар доираи нишаст мулоқотҳои дуҷонибаи байни доираҳои соҳибкорию сармооягузории ду кишвар дар сиғаи В2В баргузор карда шуд.