Вохӯрӣ бо намояндагони ширкати Mega Fortis Group

Санаи 16-уми июн раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо намояндагони ширкати Mega Fortis Group-и Малайзия мулоқот анҷом дод.

Зимни мулоқот раиси Кумита ба меҳмонон оид ба сиёсати Ҳукумати Ҷумҳурии Тоҷикистон дар самти ҷалби сармоягузорӣ, ислоҳоти иқтисодӣ, муҳити соҳибкорӣ, инчунин имкониятҳо ва лоиҳаҳои афзалиятноки сармоягузории кишвар маълумоти муфассал пешниҳод намуд.

Аз ҷумла, имкониятҳои ҳамкорӣ дар бахшҳои саноат, логистика, истеҳсолот, савдо, рушди инфрасохтори муосир, минтақаҳои озоди иқтисодӣ ва таъсиси корхонаҳои муштарак мавриди таваҷҷуҳи махсус қарор гирифтанд.

Намояндагони ширкати Mega Fortis Group фаъолият ва таҷрибаи худро дар соҳаи истеҳсоли маҳсулоти муҳофизатӣ, маводи бастабандӣ, таъминоти саноатӣ, логистика ва идоракунии занҷираи таъминот муаррифӣ намуда, омодагии худро ҷиҳати омӯзиши имкониятҳои сармоягузорӣ дар Ҷумҳурии Тоҷикистон изҳор карданд.

Ҳамчунин, ҷониби ширкат аз нақшаҳои худ оид ба таъсиси иқтидорҳои истеҳсолӣ дар Тоҷикистон ва роҳандозии истеҳсоли маҳсулоти муҳофизатӣ, бастабандӣ ва дигар маҳсулоти саноатӣ бо мақсади таъмини бозори дохилӣ ва содироти минбаъдаи онҳо ба бозорҳои минтақавӣ ва байналмилалӣ маълумот дод.

Дар анҷоми мулоқот ҷонибҳо омодагии худро барои идомаи муколамаи созанда, омӯзиши имкониятҳои амалии ҳамкорӣ ва татбиқи лоиҳаҳои муштараки сармоягузорӣ ба манфиати рушди иқтисоди Ҷумҳурии Тоҷикистон таъкид намуданд.