Вохурӣ бо роҳбарият ва намояндагони «Газпром Медиа Холдинг»

01.07.2026/ш. Душанбе

Имрӯз, дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон вохурии Раиси Кумита Султон Раҳимзода бо роҳбарият ва намояндагони «Газпром Медиа Холдинг» баргузор гардид.

Зимни мулоқот масъалаҳои ба роҳ мондани ҳамкориҳои мутақобилан судманд дар самти муаррифии имкониятҳои сармоягузории Ҷумҳурии Тоҷикистон, ҷалби сармояи хориҷӣ ва истифодаи иқтидори расонавии «Газпром Медиа Холдинг» ҷиҳати тарғиби фазои мусоиди сармоягузории кишвар мавриди баррасӣ қарор гирифт.

Раиси Кумита Султон Раҳимзода зимни мулоқот оид ба ислоҳоти иқтисодӣ, тадбирҳои андешидаи Ҳукумати Ҷумҳурии Тоҷикистон дар самти беҳтар намудани фазои сармоягузорӣ, инчунин имкониятҳои мавҷуда дар бахшҳои афзалиятноки иқтисоди миллӣ, аз ҷумла бахши сайёҳӣ маълумоти муфассал пешниҳод намуд.

Дар навбати худ, намояндагони «Газпром Медиа Холдинг» ба рушди ҳамкориҳо бо Ҷумҳурии Тоҷикистон таваҷҷуҳ зоҳир намуда, омодагии худро ҷиҳати татбиқи лоиҳаҳои муштараки иттилоотӣ, таҳияи маводи муаррифӣ ва инъикоси иқтидори сармоягузорӣ, иқтисодӣ ва сайёҳии кишвар тавассути платформаҳои расонавии худ иброз доштанд.

Дар анҷоми мулоқот ҷонибҳо омодагии худро барои густариши ҳамкориҳои мутақобилан судманд ва татбиқи ташаббусҳои муштарак, ки ба муаррифии бештари имкониятҳои сармоягузории Ҷумҳурии Тоҷикистон дар сатҳи байналмилалӣ мусоидат менамоянд, таъкид карданд.