Баргузории Форуми сармоягузории Тоҷикистону Арабистони Саудӣ

Санаи 24 декабри соли 2022 дар доираи ҷаласаи сеюми Комиссияи байниҳукуматии Тоҷикистону Шоҳигарии Арабистони Саудӣ оид ба ҳамкориҳои иқтисодӣ дар бинои Муассисиаи давлатии “Китобхонаи миллӣ” Форуми сармоягузории Тоҷикистону Арабистони Саудӣ бо иштироки Раиси Кумитаи давлатии сармоягузорӣ ва идораи амволи давлатӣ Қодирзода Саъдӣ Сангинмурод ва Вазири сармоягузории Шоҳигарии Арабистони Саудӣ Холид ал Фалиҳ баргузор гардид. 

Дар Форуми мазкур намояндагони зиёда аз 200 ширкату корхонаҳои соҳаҳои гуногуни фаъолияти хоҷагидории Тоҷикистону Арабистони Саудӣ, аз ҷумла энергетика, сохтмон, нақлиёт, логистикӣ, кишоварзӣ, молияву бонкдорӣ, телекоммуникатсия, суғуртакунӣ ва тиҷорат, инчунин роҳбарон ва намояндагони вазорату идораҳои давлатӣ иштирок намуданд.

Дар доираи Форум ба иштирокчиён фазо ва имкониятҳои сармоягузории ҳарду кишвар дар соҳаҳои гуногун муаррифӣ карда шуд.

Қайд карда шуд, ки дар солҳои охир тавсеаи робитаҳои тиҷоратии Тоҷикистону Арабистони Саудӣ ба назар мерасад, ки заминаи ин иродаи сиёсии роҳбарони ду кишвар, тақвияти ҳамкорӣ дар доираи комиссияи байниҳукуматӣ ва як қатор чорабиниҳои муҳиме, ки дар ин муддат баргузор шуданд, аз ҷумла сафарҳои сатҳи олӣ ва форумҳои сармоягузории Тоҷикистону Арабистони Саудӣ заминаи мусоидро барои муколамаи созанда ва барқарор намудани робитаҳои тиҷоратӣ байни соҳибкорони ду кишвар фароҳам оварданд.

Ҳамзамон дар доираи форум вохӯриҳои дуҷонибаи соҳибкорони ҳарду кишвар дар формати “Соҳибкор бо соҳибкор” (B2B) ва бахши давлатию хусусии ҳарду ҷониб баргузор гардида, масъалаҳои тиҷоратию сармоягузорӣ матраҳ карда шуданд.

Аз натиҷаи вохӯриҳо ба имзорасонии санадҳои ҳамкорӣ байни доираҳои соҳибкории ҳарду кишвар дар назар дошта шудааст.

Ҳамзамон пас аз қисмати расмии Форум ба сармоягузорони Арабистони Саудӣ имконият фароҳам оварда шуд, ки аз корхонаҳои саноатии шаҳри Душанбе боздид намоянд.