Русский
English
478 Санаи 16 июни соли ҷорӣ дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон таҳти унвони “Ваҳдати миллӣ омили рушди ҷомеа ” чорабинӣ доир гардид.
Чорабиниро муовини раиси Кумита Зуҳрзода Саид оғоз намуда, қайд кард, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста талқин месозанд, ки бунёди давлати демократӣ, ҳуқуқбунёд, дунявӣ ва ташаккули ҷомеаи шаҳрвандӣ дар Тоҷикистон, ки мо дар роҳи эъмори он бо қадамҳои устувор пеш рафта истодаем, далели равшану возеҳи тантанаи сулҳу оромӣ, ваҳдати миллӣ ва ҳамдигарфаҳмии халқи азизамон ба шумор меравад. Боиси хушнудӣ ва бахти миллати тоҷик аст, ки пас аз талошу қаҳрамонӣ ва ҷоннисориҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Созишномаи истиқрори сулҳ ва ризоияти миллӣ дар Тоҷикистон ба имзо расид ва барои тоҷикон иттиҳод, ягонагӣ, якпорчагӣ, ҳамдигарфаҳмӣ, амнияту осоиштагӣ, ифтихори миллӣ, ҳамзистии осоишта, ҷараёни бомароми созандагию ободониро дар кулли соҳаҳо ҳамчун ҳадя овард.
Сипас, мутахассиси пешбари раёсати таҳлил ва ояндабинии сиёсати дохилии Маркази тадқиқоти стратегии назди Президенти Ҷумҳурии Тоҷикистон - Алиназар Ашуров, вобаста ба ҳифзи ваҳдати миллӣ баромад намуда, изҳор дошт, ки воқеияти сиёсӣ ва ҳақиқатҳои рӯзгор бозгӯйи онанд, ки ба василаи ваҳдати миллӣ давлатҳо муҳимтарину бузургтарин ормону ҳадафҳои миллии худро амалӣ гардонидаанд. Чунин воқеиятро таҷриба ва таърихи сиёсии Ҷумҳурии Тоҷикистон ба таври дақиқ собит намуд, ки ваҳдати миллӣ омили муҳимтарини пешрафти шахс, ҷомеа ва давлат мебошад. 
Дар фарҷоми ҷаласа муовини раиси Кумита Зуҳурзода Саид барои иштироки намояндаи Маркази тадқиқоти стратегии назди Президенти Ҷумҳурии Тоҷикистон дар чорабинии мазкур изҳори сипос намуда, барои иштироккунандагон ҷиҳати расидан ба ҳадафҳои неку созанда ва ҳифз намудани ваҳдати миллӣ барору комёбӣ ва муваффақиятҳои беназирро таманно намуд.
