Ҷаласаи чоруми Комиссияи муштараки байниҳукуматии Ҷумҳурии Тоҷикистон ва Амороти Муттаҳидаи Араб оид ба ҳамкории иқтисодӣ, тиҷоратӣ ва техникӣ

Санаи 29 июли соли 2021 таҳти роҳбарии раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодирзода Саъдӣ Сангинмурод ва муовини вазири корҳои хориҷӣ ва ҳамкориҳои байналмилалии Амороти Муттаҳидаи Араб оид ба масъалаҳои иқтисодӣ ва тиҷоратӣ Абдул Носир ал-Шаалӣ дар шакли маҷозӣ ҷаласаи чоруми Комиссияи муштараки Ҷумҳурии Тоҷикистон ва Амороти Муттаҳидаи Араб оид ба ҳамкориҳои иқтисодӣ, тиҷоратӣ ва техникӣ баргузор гардид.

Дар ҷаласа ҳолати кунунӣ ва дурнамои густариши ҳамкории мутақобилан судманд миёни Тоҷикистон ва Амороти Муттаҳидаи Араб дар соҳаҳои сиёсӣ, иқтисодӣ, тиҷоратӣ, сармоягузорӣ, сайёҳӣ, кишоварзӣ, алоқаи ҳавоӣ, таҳкими пояи қарордодию ҳуқуқӣ ва ҳамкорӣ дар чорчӯбаи созмонҳои байналмилаливу минтақавӣ баррасӣ гардиданд.

Ҷонибҳо роҳандозии тамосҳои мунтазамро баҳри рушду тавсеаи равобити дуҷониба ҳамчун абзори муоссир арзёбӣ намуданд. Дар ҳошияи ҷаласа Ёддошти тафоҳум миёни Палатаи савдо ва саноати Ҷумҳурии Тоҷикистон ва Федератсияи Палатаҳои савдо ва саноати Амороти Муттаҳидаи Араб оид ба таъсиси Шӯрои муштараки соҳибкорон ба имзо расид.

Дар фарҷоми ҷаласа аз ҷониби ҳамраисони комиссияи мазкур Протоколи ҷаласаи чоруми Комиссияи муштараки Ҷумҳурии Тоҷикистон ва Амороти Муттаҳидаи Араб оид ба ҳамкориҳои иқтисодӣ, тиҷоратӣ ва техникӣ баимзо расонида шуд.