Баимзорасонии созишномаи сармоягузорӣ оид ба сохтмони гармхонаи инноватсионӣ барои истеҳсоли сабзавот дар шаҳри Левакант ва ташкил намудани се маркази тақсимотии яклухт дар шаҳрҳои Душанбе, Бохтар ва ноҳияи Спитамен

Имруз, 28 сентябри соли 2021 дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон  маросими баимзорасонии Созишномаи сармоягузорӣ байни Ҳукумати Ҷумҳурии Тоҷикистон ва ҷамъияти дорои масъулияти маҳдуди маркази тақсимоти яклухти «Витаминҳои Тоҷикистон» оид ба  сохтмони гармхонаи инноватсионӣ барои истеҳсоли сабзавот дар шаҳри Левакант ва ташкил намудани се маркази тақсимотии яклухт дар шаҳрҳои Душанбе, Бохтар ва ноҳияи Спитамен  баргузор гардид.

Ҷамъияти дорои масъулияти маҳдуди маркази тақсимоти яклухти «Витаминҳои Тоҷикистон» сохтмони гармхонаи инноватсионӣ барои истеҳсоли сабзавот дар шаҳри Левакант ва ташкил намудани се маркази тақсимотии яклухт дар шаҳрҳои Душанбе, Бохтар ва ноҳияи Спитаменро бо сармоягузории умумии 20,0 млн. доллари амрикоӣ (228,0 млн. сомонӣ) ба нақша гирифтааст.

Лоиҳа аз ду марҳилаи асоси иборат буда, дар марҳилаи якум – сохтмони гармхонаи инноватсионӣ барои истеҳсоли сабзавот дар шаҳри Левакант ба маблағи 2,6 миллион доллари амрикоӣ (29,6 млн. сомонӣ) сармояи хориҷӣ амалӣ хоҳад шуд.

Татбиқи марҳилаи дуюми лоиҳа ташкил намудани се маркази тақсимотии яклухт дар шаҳрҳои Душанбе, Бохтар ва ноҳияи Спитамен пешбинӣ менамояд, ки ҳаҷми маблағгузории он 17,4 миллион доллари амрикоиро (198,3 млн. сомонӣ) ташкил медиҳад. 

Бо татбиқи пурраи лоиҳаҳо 90 дарсад ҷойҳои нави кории муҳайёшаванда барои шаҳрвандони маҳаллӣ пешбинӣ карда мешаванд.

Татбиқи ин лоиҳаҳо ба амалишавии ҳадафи чоруми миллии стратегӣ дар самти саноатикунонии кишвар мутобиқ мебошад.