Баимзорасонии созишномаи сармоягузорӣ байни Ҳукумати Ҷумҳурии Тоҷикистон ва ҷамъияти дорои масъулияти маҳдуди корхонаи муштараки «Зарафшон»

Санаи 12 ноябри соли 2021 дар Кумитаи давлатии сармоягузорӣ ва идораи амволи давлатӣ маросими баимзорасонии Созишномаи сармоягузорӣ байни Ҳукумати Ҷумҳурии Тоҷикистон ва ҷамъияти дорои масъулияти маҳдуди корхонаи муштараки «Зарафшон» оид ба коркарди маҷмӯии конҳои «Тарор», «Ҷилав» ва бунёди корхонаи металлургӣ барои барориши маҷмӯии тилло ва мис тавассути оксидкунии фишурда аз хокаҳои бойгардонидашудаи тилло ва миси кони «Тарор» дар шаҳри Панҷакенти вилояти Суғд»  баргузор гардид.

Ҷамъияти дорои масъулияти маҳдуди корхонаи муштараки «Зарафшон» бо мақсади таъмини иҷрои дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тасмим гирифтааст, ки корхонаи металургии истеҳсоли мисро бо ҷалби 117 млн. доллари амрикоӣ сохта ба истифода диҳад.

Бо мавриди истифода қарор гирифтани корхона барои аҳолии маҳаллӣ зиёда аз 200 ҷойҳои кории нав ташкил карда мешавад.

Татбиқи ин лоиҳа ба амалишавии ҳадафи чоруми стратегӣ дар самти саноатикунонии босуръати кишвар мусоидат менамояд.