Мизи мудаввар дар мавзӯи «Вазъияти хизматрасонии машваратӣ ва имкониятҳои мусоидат ба сармоягузорон дар Ҷумҳурии Тоҷикистон»

Санаи 24 феврали соли 2022 бо ташаббуси Кумитаи давлатии сармоягузорӣ ва идораи амволи давлатӣ дар ҳамкорӣ бо вазорату идораҳои дахлдор мизи мудаввар дар мавзӯи «Вазъияти хизматрасонии машваратӣ ва имкониятҳои мусоидат ба сармоягузорон дар Ҷумҳурии Тоҷикистон» баргузор гардид.

Мизи мудаввар бо сухани ифтитоҳии муовини раиси Кумитаи давлатии сармоягузорӣ ва идораи амволи давлатӣ Хуршедаи Қодир оғоз гардид.

Дар чорабинӣ намояндагони Вазорати рушди иқтисод ва савдо,  Муассисаи давлатии «Маркази татбиқи лоиҳаҳои шарикии давлат ва бахши хусусӣ» ва беш аз 20 ширкатҳои машваратӣ (консалтингӣ) дар шакли ҳузурию маҷозӣ  иштирок намуданд.

Дар рафти чорабинии мазкур, аз ҷониби шахсони масъул вобаста ба механизми созишномаҳои сармоягузорӣ, фаъолияти минтақаҳои озоди иқтисодӣ ва созишномаи шарикии давлат ва бахши хусусӣ рӯнамо гузаронида шуда, вазъияти мавҷудаи хизматрасонии машваратӣ, имкониятҳои ҳамкорӣ ва хизматрасонии сармоя мавриди баррасӣ қарор дода шуд.

Дар фарҷоми чорабинӣ, таклифҳои мушаххас оид ба боз ҳам фароҳам овардани имкониятҳо ва фазои мусоиди сармоягузориву соҳибкорӣ ва раванди пешниҳоди хизматрасониҳои машваратӣ ба сармоягузорону соҳибкорон пешниҳод гардиданд.

Мизи мудаввар дар рӯҳияи созанда баргузор гардида, иштироккунадагон бо назардошти таҷрибаҳои худ фаъолона мубоҳиса намуданд.