Мизи мудаввар бо сармоягузорони Россия дар Тоҷикистон

Санаи 15 апрели соли 2022 бо ташаббуси Кумитаи давлатии сармоягузорӣ ва идораи амволи давлатӣ дар ҳамкорӣ бо вазорату идораҳои дахлдор мизи мудаввар бо сармоягузорони Россия дар Тоҷикистон баргузор гардид.

Мизи мудаввар бо сухани ифтитоҳии роҳбарияти Кумитаи давлатии сармоягузорӣ ва идораи амволи давлатӣ, Палатаи савдо ва саноат, Намояндагии тиҷоратии Россия дар Тоҷикистон ва Шӯрои ҳамкории Ҷумҳурии Тоҷикистон бо Федератсияи Россия оғоз гардид.

Дар чорабинӣ намояндагони вазоратҳои рушди иқтисод ва савдо, саноат ва технологияҳои нав, Хадамоти гумрук, Академияи миллии илмҳо, Кумитаи андоз, Палатаи савдо ва саноат, Муассисаи давлатии «Маркази татбиқи лоиҳаҳои шарикии давлат ва бахши хусусӣ» ва ширкатҳои консалтингӣ вобаста ба имкониятҳои рушди ҳамкории Тоҷикистону Россия тавассути рӯнамо баромад намуданд.

Ҳамзамон, дар чорабинии мазкур, намондагони Сафорати Федератсияи Россия дар Ҷумҳурии Тоҷикистон, Бонки рушди Авруосиё, намояндагии Маркази содиротии Русия дар Ҷумҳурии Тоҷикистон, Институти фармакологии Академияи илмҳои Россия ба номи Голубев ва беш аз 30 ширкатҳое, ки бо сармоягузории ҷонибӣ россиягӣ дар Тоҷикистон фаъолият мукунанд, ширкат варзиданд.

Дар рафти чорабинӣ аз ҷониби шахсони масъул вобаста ба имконият ва фазои мусоиди сармоягузорӣ, вазъияти имрузаи сармоягузории Россия дар Тоҷикистон, имкониятҳои ҷалби сармоя ва масири ҳамкориҳои мутақобилаи судманд мавриди баррасӣ қарор дода шуд.

Иштирокчиёни чорабинӣ ба рушди муносибатҳо ва ҳамкориҳои иқтисодии дуҷониба баҳои баланд дода, таклиф гардид, ки чунин ҳамоишҳои муҳим мунтазам баргузор карда шаванд.