Баимзорасонии Созишномаи сармоягузорӣ байни Ҳукумати Ҷумҳурии Тоҷикистон, Ҷамъияти дорои масъулияти маҳдуди «АВЕСТО ГУРУҲ» ва Ширкати «ULASIM IC VE DIS TICARET ANONIM SIRKETI»-и Ҷумҳурии Туркия

Санаи 9 августи соли 2018 дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон маросими баимзорасии “Созишномаи сармоягузорӣ байни Ҳукумати Ҷумҳурии Тоҷикистон, Ҷамъияти дорои масъулияти маҳдуди «АВЕСТО ГУРУҲ» ва Ширкати «ULASIM IC VE DIS TICARET ANONIM SIRKETI»-и Ҷумҳурии Туркия оид ба сохтмони Корхонаи истеҳсоли воситаҳои нақлиёти мусофирбари ҷамъиятию боркаш ва ба роҳ мондани маркази хизматрасонии техникӣ дар Ҷумҳурии Тоҷикистон” доир гардид.

Созишномаи мазкурро аз номи Ҳукумати Ҷумҳурии Тоҷикистон Ҳамрализода Фаррух Маҳмуд -Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, аз номи Ҷамъияти дорои масъулияти маҳдуди “Авесто Гуруҳ”, директори генералӣ – Мирзо Муҳаммад Файзуллозода ва аз номи  ва ширкати «ULASIM IC VE DIS TICARET ANONIM SIRKETI»-и Ҷумҳурии Туркия – менеҷери генералии ширкат Ремзи Бака ба имзо расониданд.

Қобили қайд аст, ки бо мақсади навсозии парки техникии шаҳри Душанбе барои харидории 100 автобуси тамғаи “AKIA” бо дарназардошти бандубасти он дар ҳудуди Ҷумҳурии Тоҷикистон байни Мақомоти иҷроияи ҳокимияти давлатии шаҳри Душанбе ва Ширкати туркии «AKIA» шартномаи ҳамкорӣ ба имзо расонида шудааст.

Моҳи феврали соли ҷорӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолияти корхонаи муштараки “AKIA AVESTO”, ки бори аввал дар мамлакат бандубасти автобусҳои тамғаи «AKIA»-ро ба роҳ мондааст, шинос шуда, амалӣ кардани иқдоми мазкурро дар пешрафт ва баланд гардидани сатҳу сифати хизматрасонӣ дар соҳаи мусофиркашонии шаҳри Душанбе муҳиму саривақтӣ арзёбӣ намуданд.

Дар мавриди ба фаъолият оғоз намудани корхонаи  нав иқтидори истеҳсоли автобусҳо дар як сол аз 250 то 300 ададро ташкил дода, шумораи кормандон аз ҳисоби мутахассисони маҳаллӣ на кам аз 200 нафар хоҳад шуд. 

Корхонаи мазкур дар муҳлати як сол сохта ба истифода дода шуда, дар оянда ташкили марказҳои хизматрасонӣ дар дигар шаҳру навоҳии ҷумҳурӣ ба нақша гирифта шудааст.

Сохтмони корхонаи истеҳсоли воситаҳои нақлиёти мусофирбарии ҷамъиятию боркаш ва ба роҳ мондани маркази хизматрасонии техникӣ дар Ҷумҳурии Тоҷикистон дар заминаи Ҷамъияти дорои масъулияти маҳдуд «Акиа Авесто Автоматив Индастри» ва Ҷамъияти дорои масъулияти маҳдуди «Сити Сервис Лтд» амалӣ хоҳад гашт.