Вохӯрии Раиси Кумитаи давлатии сармоягузорӣ бо Директори Минтақавии Корпоратсияи Байналмилалии Молиявии Гурӯҳи Бонки Ҷаҳонӣ дар Осиёи Марказӣ

6 декабр вохурии Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Ҳамрализода Фаррух Маҳмуд бо Директори Минтақавии Корпоратсияи Байналмилалии Молиявӣ (IFC) дар Осиёи Марказӣ хонум Касандра Колберт доир гардид.

Зимни суҳбат Раиси Кумита миннатдории худро ба Корпоратсияи Байналмилалии Молиявии Гурӯҳи Бонки Ҷаҳонӣ ҷиҳати ҳамкории сатҳи баланд шуруъ аз соли 2006 баён намуданд. “Ба даст овардани натиҷаҳои баланди ҳамкорӣ дар соҳаҳои афзалиятноки Кумита, аз ҷумла беҳтар намудани муҳити тиҷоратӣ, ислоҳоти системаи иҷозатдиҳӣ ва санҷиши фаъолияти субъектҳои хоҷагидорро мехоҳам махсус қайд намоям”- иброз доштанд Ҳамрализода Фаррух.

Касандра Колберт низ дар навбати худ аз натиҷаи ҳамкорӣ дар самти рушди соҳибкорӣ изҳори хушнудӣ намуда, иброз доштанд, ки Корпоратсияи Байналмилалии Молиявӣ (IFC) ҳамеша омода аст, то дар доираи лоиҳаҳо минбаъд низ кӯмаки худро дар ин самт расонад.

Дар ин вохӯрӣ ҷонибҳо бештар ба рушди соҳаи сайёҳӣ, такмил ва автоматикунонии системаи андоз, коркард ва бехатарии маҳсулоти хӯрока, коркарди канданиҳои фоиданок ва рушди бахши хусусӣ таваҷҷуҳ зоҳир намуданд. 

Зимни суҳбат ҷонибҳо атрофи дастгирии лоиҳаҳои иноватсионӣ (стартапҳо), ки бевосита ба рушди бахши хусусӣ дар кишвар такони ҷиддӣ хоҳад бахшид, ибрози андеша намуданд. Таъкид гардид, ки рушди бахши хусусӣ яке аз масъалаҳои муҳим дар самти пурқувват гардидани иқтисоди миллӣ ба шумор меравад ва дар маркази диққати Ҳукумати Ҷумҳурии Тоҷикистон  қарор дорад. 

Ёдовар мешавем, ки Корпоратсияи Байналмилалии Молиявии Гурӯҳи Бонки Ҷаҳонӣ (IFC) буда, соли 1956 бунёд ёфтааст ва ҳадафи аслии он рушди устувори сармояи хусусӣ дар кишварҳои рӯ ба тараққӣ мебошад.