Русский
English
481 Санаи 14 сентябри соли ҷорӣ бо ибтикори Кумитаи давлатии сармоягузорӣ ва идораи амволи давлатӣ конфронси видеоӣ бо соҳибкорону сармоягузорони Тоҷикистону Туркия баргузор карда шуд.
Дар кори конфронс роҳбарияти намояндагиҳои дипломатии Ҷумҳурии Тоҷикистон дар Ҷумҳурии Туркия ва Ҷумҳурии Туркия дар Ҷумҳурии Тоҷикистон, Палатаи савдо ва саноати Ҷумҳурии Тоҷикистон, Шурои соҳибкорони Туркия – Тоҷикистон, Шурои робитаҳои иқтисодии хориҷии Туркия (DEIK) ва беш аз 180 нафар намояндагони бахши хусусии Тоҷикистону Туркия иштирок намуданд.
Зимни баргузории чорабинӣ пас аз сухани ифтитоҳии роҳбарияти Кумитаи давлатии сармоягузорӣ ва идораи амволи давлатӣ аз ҷониби масъулини КВД “Тоҷинвест” барои иштирокчиёни чорабинӣ рӯнамо оид ба имкониятҳои сармоягузории Ҷумҳурии Тоҷикистон пешниҳод карда шуда, аз доираҳои соҳибкорону сармоягузорони Ҷумҳурии Туркия барои иштирок дар лоиҳаҳои сармоягузории афзалиятноки ҷумҳурӣ даъват ба амал оварда шуд.
Ҳамзамон, дар доираи чорабинии мазкур дар бахшҳои алоҳида оид ба ҳамкориҳо дар соҳаҳои кишоварзӣ ва хурока, насоҷӣ, сохтмон ва энергетика миёни соҳибкорону сармоягузорони ду кишвар мулоқотҳои судманд ҷиҳати ташкили корхонаҳои муштарак дар Ҷумҳурии Тоҷикистон анҷом дода шуд.
Дар маҷмӯъ, видеоконфронс дар фазои ҳамдигарфаҳмӣ ва ҳусни тафоҳум доир гардида, байни ҷонибҳо мубоҳисаи хубу доманадор барои дарёфти роҳҳои нави ҳамкории тиҷоратию иқтисодӣ сурат гирифт.
