Баргузории мизи мудаввар вобаста ба лоиҳаи «Консепсияи сиёсати давлатии ҷалб ва ҳимояи сармоягузориҳо»

Санаи 28 августи соли 2020 дар муассисаи давлатии «Душанбе Плаза» аз ҷониби Кумитаи давлатии сармоягузорӣ ва идораи амволи давлатӣ дар ҳамкорӣ бо Барномаи дастгирии навовариҳои сиёсати иқтисодии Департаменти рушди ҳамкориҳои байналмилалии Британияи Кабир ва иштироки намояндагони вазорату идораҳои ҷумҳурӣ лоиҳаи «Консепсияи сиёсати давлатии ҷалб ва ҳимояи сармоягузориҳо» муаррифӣ карда шуд.

Дар доираи мизи мудаввари мазкур аз ҷониби коршиноси масоили иқтисодӣ ва сармоягузорӣ хориҷӣ Антонио Даза ба тариқи видеоконфронс таҷрибаи беҳтарин дар самти беҳтаргардонии фазои сармоягузорӣ ва ҷалби сармояи мустақими хориҷӣ муаррифӣ карда шуда, лоиҳаи пешакии Консепсия дар шакли рунамо ба иштирокчиён пешниҳод карда шуд.

Зимни муаррифии лоиҳаи консепсия иштирокчиёни ҷаласа доир ба тамоюлҳои вобаста ба ҷалб, ҳимоя ва беҳтаргардонии фазои сармоягузорӣ дар минтақа ва ҷаҳон, ҳадафҳои стратегӣ ва нақши сармоягузориҳои мустақими дохилӣ ва хориҷӣ, такмили қонунгузории соҳа  ва таҷрибаҳои пешқадам, рушди бахши хусусӣ ва рақобатазирӣ ибрози ақида намуданд.

Дар маҷмӯъ, чорабинии мазкур дар фазои ҳамдигарфаҳмӣ ва ҳусни тафоҳум доир гардида, байни ҷонибҳо мубоҳисаи хубу доманадор барои дарёфти роҳҳои нави ҳамкории тиҷоратию иқтисодӣ сурат гирифт.