Ба ифтихори Рӯзи Парчами давлатӣ маҷлиси тантанавӣ баргузор гардид.

Имрӯз дар маҷлисгоҳи Кумитаи давлатии сармоягузорӣ ва идораи амволи давлатӣ бо иштироки Раиси Кумита, муовинон, кормандони дастгоҳи марказӣ ва ташкилоту муассисаҳои системаи Кумита  бахшида ба Рӯзи парчами давлатии Ҷумҳурии Тоҷикистон маҷлиси тантанавӣ баргузор гардид.

Раиси Кумита Фаррух Ҳамрализода чорабиниро бо сухани ифтитоҳӣ оғоз карда, қайд намуд, ки Парчами миллӣ мояи ифтихори ҳар як шаҳрванди Тоҷикистон, ифодагари иттиҳоду сарҷамъӣ, нангу номус, ватандӯстиву ватанпарварӣ ва ҳуввияти миллии мардуми фарҳангии мо буда, мақсаду мароми созандаи тоҷиконро дар ҷилои рангҳои худ инъикос намудааст.

Иброз гардид, ки соли 2009 бо ибтикори Асосгузори сулҳу ваҳдати миллӣ – Пешвои миллат, Президенти кишвар Эмомалӣ Раҳмон бо нишони эҳтирому садоқат ба Парчами миллӣ, гиромидошту арҷгузории ин рамзи давлати соҳибистиқлоламон 24-уми ноябр чун Рӯзи Парчам эълон гардид ва инак 11 сол мешавад, ки мо онро чун воқеаи фараҳбахш таҷлил менамоем. 

Дар ҷаласа қайд гардид, ки Парчами давлатӣ ҳар фарди бонангу номусро ба ифтихор аз давлату ватандорӣ, ҳифзи истиқлолияту дастовардҳои он ва пеш аз ҳама, саъю талоши пайваста ба хотири ободии сарзамини аҷдодӣ ҳидоят намуда, ҳангоми маъракаҳои расмии давлатӣ, чорабиниҳои фарҳангиву варзишӣ ва байналмилалӣ ҳамчун рамзи шоистаи ватандории тоҷикон барафрохта мешавад.

Дар фарҷом Раисикунанда кормандонро ба ифтихори Рӯзи Парчами давлатӣ табрик гуфта, ба ҳозирин хонаи обод, тандурустиву хушбахтӣ ва дар роҳи расидан ба ҳадафҳои созандаву бунёдкорӣ, муваффақиятҳои беназирро орзу намуд.