Ҷамъбасти натиҷаҳои фаъолияти Кумитаи давлатии сармоягузорӣ ва идораи амволи давлатии Ҷумҳурии Тоҷикистон соли 2020 ва вазифаҳо барои соли 2021

Санаи 8 январи соли 2021 дар Кумитаи давлатии сармоягузорӣ ва идораи амволи давлатӣ бо иштироки Раиси Кумита, намояндаи Дастгоҳи иҷроияи Президенти Ҷумҳурии Тоҷикистон, муовинони Раис, сардорони воҳидҳои сохтори дастгоҳи марказӣ ва ташкилотҳои системаи Кумита, инчунин  сардорони Раёсатҳо, шуъбаҳои (бахш) сармоягузорӣ ва идораи амволи давлатии мақомоти иҷроияи ҳокимияти давлатии шаҳри Душанбе, вилояти Хатлон ва ноҳияҳои тобеи марказ ҷаласаи ҳайати мушовараи Кумита оид ба ҷамъбасти натиҷаҳои фаъолияти Кумита дар соли 2020 ва вазифаҳо барои соли 2021 баргузор гардид.

Ҳамзамон, дар ҷараёни кори ҷаласа сардорони Раёсатҳои сармоягузорӣ ва идораи амволи давлатии мақомоти иҷроияи ҳокимияти давлатии Вилояти Мухтори Куҳистони Бадахшон, вилоятҳои Суғд тариқи видеоконфронс дар реҷаи он-лайн иштирок намуданд.

Дар ҷаласа аз тадбирҳои амалигардида оид ба иҷрои вазифаҳое, ки дар Паёми Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон 26 декабри соли 2019 зикр гардидаанд, бандҳои дахлдори қарори Ҳукумати Ҷумҳурии Тоҷикистон аз 3 феврали соли 2020 «Дар бораи ҷамъбасти натиҷаҳои рушди иҷтимоию иқтисодии Ҷумҳурии Тоҷикистон дар      соли 2019 ва вазифаҳо барои соли 2020» ва дар маҷмӯъ самтҳои фаъолияти Кумита натиҷагирӣ карда шуда, мушкилотҳои ҷойдошта баррасӣ гардиданд.

Бо дарназардошти ҷамъбасти натиҷаҳои фаъолияти Кумита дар соли 2020 вазифаҳо барои семоҳаи якуми соли 2021 муайян гардида, дар самти беҳтар намудани фазои сармоягузорӣ ва соҳибкорӣ, ҷалби бештари сармоя ба соҳаҳои иқтисоди миллӣ, мониторинги лоиҳаҳои сармоягузории давлатӣ, таъмини истифодаи самараноки моликияти давлатӣ, инчунин ҳавасмандгардонию дастгирии соҳибкорӣ супоришҳои дахлдор ба кормандони Кумита ва масъулини раёсату бахшҳои сармоягузорӣ ва идораи амволи давлатӣ дар маҳалҳо дода шуд.