Русский
English
339 Санаи 12 феврали соли 2021 дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон вохӯрии Раиси Кумита Қодирзода Саъдӣ ва Намояндаи доимии Барноми Рушди Созмони Милали Муттаҳид дар Ҷумҳурии Тоҷикистон хонум Пратибҳа Меҳта баргузор гардид.
Дар ҷараёни мулоқот ҷонибҳо дар бораи ҳамкориҳои кунунӣ ва имкониятҳои ҳамкории минбаъда доир ба ҷалби кумакҳои техникӣ ҷиҳати самаранок татбиқ намудани стратегияву барномаҳои рушди кишвар мубодилаи афкор намуданд, инчунин Раиси Кумитаи давлатии сармоягузорӣ ва идораи амволи давлатӣ таъкид карданд, ки бо мусоидати БРСММ Ҷумҳурии Тоҷикистон муваффақ шудааст, ки дар татбиқи ислоҳоти иқтисодӣ ва ҳадафҳои стратегӣ ба натиҷаҳои назаррас ноил гардад.
Бо назардошти ноустувории иқтисоди ҷаҳонӣ ва коҳиши вуруди сармоягузорӣ, ҷонибҳо даъват карда шуданд, ки барои беҳтар намудани фазои сармоягузорӣ ва ҷалби бештари сармояи мустақими хориҷӣ чораҳои мушаххаси амалӣ андешанд.
Дар фарҷоми мулоқот ҷонибҳо омодагии худро барои тавсеа ва истифодаи самараноки ҳамкориҳои дуҷониба дар соҳаҳои гуногуни иқтисод изҳор намуданд.
