Мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон бо муовини Вазири молияи Япония

Санаи 29 ноябри соли 2022 дар Токио мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон муҳтарам Қодирзода Саъдӣ бо муовини Вазири молияи Япония ҷаноби Масато Канда доир гардид.

Зимни мулоқот маҷмӯи масъалаҳо вобаста ба ҳамкории тиҷоратию иқтисодӣ, аз ҷумла ҷалби бештари сармояи мустақим аз Япония ба иқтисодиёти Ҷумҳурии Тоҷикистон барои татбиқи лоиҳаҳои афзалиятнок дар самтҳои иқтисоди сабз, энергетика, манбаҳои нерӯи таҷдидпазир, истихроҷу коркарди канданиҳои фоиданок ва коркарди ашёи хом мавриди баррасии ҷонибҳо қарор гирифт.

Дар рафти мулоқот фазои мусоид ва имкониятҳои фарохи сармоягузории Ҷумҳурии Тоҷикистон муаррифӣ гардида, оид ба тадбирҳои созандаи Ҳукумати кишвар дар самти ислоҳоти соҳаҳои иқтисоди миллӣ ва барномаву стратегияҳои давлатӣ барои рушди соҳибкорӣ, ҷалби бештари сармояи хориҷӣ, таъсиси ширкатҳои муштарак ва дастгирии соҳибкории хурду миёна маълумот пешниҳод гардид.

Дар маҷмӯъ, вохӯрии болозикр дар фазои ҳамдигарфаҳмӣ доир гардида, масъалаҳои зикргардида бо истифода аз имконоти васеъ ҷиҳати иртибот ва мубодилаи афкор қарор гирифтанд.