Мулоқоти роҳбарияти Кумитаи давлатии сармоягузорӣ ва идораи амволи давлатӣ бо сармоягузорон ва соҳибкорони шаҳри Санкт – Петербурги Федератсияи Россия

Санаи 24 майи соли 2022 дар Кумитаи давлатии сармоягузорӣ ва идораи амволи давлатӣ мулоқоти раиси Кумита Қодирзода Саъдӣ ва ҳайати соҳибкорон ва сармоягузорони шаҳри Санкт – Петербурги Федератсияи Россия таҳти роҳбарии муовини Раиси Кумитаи муносибатҳои беруна Ҳукумати шаҳри Санкт – Петербург Арби Абубакров баргузор гардид.

Зимни вохӯрӣ аз ҷониби роҳбарияти Кумита, доир ба имкониятҳои сармоягузории мамлакат, қонунгузорӣ, имтиёзҳо ва соҳаҳои афзалиятноки ҳамкориҳои дуҷонибаи иқтисодию тиҷоратӣ, густариши тиҷорат ва гуногунсозии ғуфра ва мизонҳои нави ҳамкорӣ, инчунин дарёфти ҳамтоён ва коршарикони худ аз доираҳои бахши хусусӣ муаррифӣ карда шуд.

Дар рафти вохӯрӣ, ҷонибҳо вобаста ба тавсеаи равобити дуҷониба бар асоси манфиатҳои мутақобан муфид, баробар ва истифодаи самарабахш аз зарфиятҳои иқтисодии ҳарду кишвар, ба мақсади густариши равобити сармоягузорию соҳибкорӣ, иқтисодию тиҷоратии байни ду кишвар ба мувофиқа расиданд.

Дар интиҳо қайд карда шуд, ки дар шароити имрӯза баргузор намудани вохӯриҳо муҳим арзёбӣ мегардад ва бо назардошти ин ҳайати меҳмонон иштироки ҷониби тоҷикистонӣ ва баръакси ин Тоҷикистон иштироки ҷониби меҳмононро дар форуму ҳамоишҳои ба нақша гирифтаи ҳамдигар муҳокима намуданд.

       Дар маҷмуъ, чорабинии мазкур дар фазои ҳамдигарфаҳмӣ ва ҳусни тафоҳум доир гардида, байни ҷонибҳо мубоҳисаи хубу доманадор барои дарёфти роҳҳои нави ҳамкории тиҷоратию иқтисодӣ, сармоягузорию соҳибкорӣ сурат гирифт.