Маросими баимзорасонии Созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди «Разес фарма» вобаста ба сохтмон ва истифодабарии Маҷмааи истеҳсоли дору ва молҳои тиббӣ

Бо дастгириҳои бевоситаи Ҳукумати Ҷумҳурии Тоҷикистон дар асоси Қонуни Ҷумҳурии Тоҷикистон «Дар бораи сармоягузорӣ», Қонуни Ҷумҳурии Тоҷикистон «Дар бораи созишномаи сармоягузорӣ» ва қарори дахлдори Ҳукумати Ҷумҳурии Тоҷикистон санаи 12 феврали соли 2024 дар бинои Кумитаи давлатии сармоягузорӣ ва идораи амволи давлатии Ҷумҳурии Тоҷикистон маросими баимзорасонии Созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди «Разес Фарма» оид ба Лоиҳаи сохтмон ва истифодабарии Маҷмааи истеҳсоли дору ва молҳои тиббӣ баргузор гардид.

Тибқи Созишномаи самроягузории мазкур, ки барои ҷалби сармоягузории хориҷӣ ба истеҳсоли маҳсулоти воридотивазкунанда, ташкили ҷойҳои нави корӣ ва татбиқи ҳадафҳои стратегии мамлакат дар самти саноатикунонии босуръати кишвар, таъмини маҳсулоти босифат ва рақобатпазир равона шудааст, сохтмон ва истифодабарии Маҷмааи истеҳсоли дору ва молҳои тиббӣ ба маблағи умумии беш аз 70,0 млн сомонӣ ба нақша гирифта шудааст. Баъди пурра ба кор даровардани корхонаи мазкур зиёда аз 200 ҷойҳои  кории доимӣ таъмин карда мешавад.

Боиси тазаккур аст, ки масъалаи таъсиси иқтидорҳои истеҳсолӣ яке аз ҳадафҳои стратегии мамлакат, ки дар «Стратегияи миллии рушди Ҷумҳурии Тоҷикистон барои давраи то соли 2030», «Стратегияи рушди саноат дар Ҷумҳурии Тоҷикистон барои давраи то соли 2030» ва «Барномаи саноатикунонии босуръати Ҷумҳурии Тоҷикистон барои солҳои 2020-2025» дарҷ шудааст, ба ҳисоб меравад.