Иштирок дар панели сатҳи баланд дар мавзӯи “Маблағгузории сабз дар занҷираи арзиши иловашуда дар доираи Ҳамкории иқтисодии минтақавии Осиёи Марказӣ (СAREC)

Санаи 2 майи соли 2024 дар шаҳри Тбилисии Грузия дар ҳошияи ҷаласаи ҳарсолаи 57-уми Шӯрони мудирони Бонки Осиёии Рушд раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон муҳтарам Султон Раҳимзода дар панели сатҳи баланд дар мавзӯи  “Маблағгузории сабз дар занҷираи арзиши иловашуда дар доираи Ҳамкории иқтисодии минтақавии Осиёи Марказӣ (СAREC)” ҳамчун панелист иштирок ва суханронӣ намуданд.

Дар чорабинии мазкур масоил ва имкониятҳо барои ташкили занҷираи арзиши иловашудаи устувор ва аз лиҳози экологӣ тоза дар минтақаи Ҳамкории иқтисодии минтақавии Осиёи Марказӣ (СAREC) бо такя ба соҳаҳои кишоварзӣ ва нақлиёт баррасӣ гардиданд.

Намояндагони ҳукуматҳо, шарикони рушд ва бахши хусусӣ нақши глобалии ҳамкории минтақавиро дар ташкили занҷираи арзиши иловашуда зимни татбиқи рӯзномаи тағйирёбии иқлим қайд намуда, роҷеъ ба зарфият ва ниёз ба сармоягузориҳо барои карбонзудоӣ, муосиргардонии бандарҳо, рақамикунонӣ, манбаъҳои барқароршавандаи энергия, мутобиқшавӣ ба тағйирёбии иқлим ва  имкониятҳои сафарбаркунии маблағҳо ва дастгирии омодасозии лоиҳаҳои иқлимӣ табодули афкор намуданд.