Мулоқотҳои раиси Кумитаи давлатии сармоягузорӣ ва идораи амволи давлатӣ дар ҳошияи Конфронси оби Душанбе

Санаи 11 июни соли ҷорӣ дар Кохи Сомон дар ҳошияи Конфронси сеюми байналмилалӣ оид ба Даҳсолаи байналмилалии амал «Об барои рушди устувор, солҳои 2018-2028» аз ҷониби раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо ҳайати кишварҳои хориҷӣ, аз ҷумла Сюзен Эллиотт мудири иҷроияи Кумитаи миллии сиёсати хориҷии Иёлоти Муттаҳиаи Амрико, собиқ сафири Иёлоти Муттаҳиаи Амрико дар Тоҷикистон (солҳои 2012-2015), Датук Нур Ҷазлон Муҳаммад муовини раиси сенати парлумони Малайзия, Басуки Ҳамидулҷоно Вазири корҳои ҷамъиятӣ ва муҳити зисти Индонезия ва Барбара Помпили фиристодаи махсуси Президенти Фаронса доир ба саммити об мулоқотҳо баргузор гардид.
Нахуст меҳмонон аз ташаббусҳои глобалии Тоҷикистон дар самти об ва баргузории Конфронси сеюми байналмилалӣ оид ба Даҳсолаи байналмилалии амал «Об барои рушди устувор, солҳои 2018-2028» баҳои баланд дода, омодагии худро барои тақвияти ҳамкориҳои минбаъда дар самти мазкур, хусусан муҳокимаи мушкилоти глобалии об ва дарёфти роҳҳои ҳаллу фасли он иброз намуданд.
Ҳамзамон дар кори вохӯриҳо бо дарназардошти вазъи кунунии ҳамкориҳои иқтисодию сармоягузории Тоҷикистон бо давлатҳои мазкур, имкониятҳои сармоягузорӣ ва ислоҳотҳои амалинамудани Ҳукумати мамлакат дар самти беҳтар намудани фазои сармоягузорӣ муаррифӣ гардида, ҷонибҳо барои истифодаи самараноки иқтидорҳои мавҷуда тавассути даъвати доираи соҳибкорӣ ба Тоҷикистон, баргузории форуму ҳамоишҳои сармоягузорӣ, коркарди захираҳои табиӣ, маблағгузории лоиҳаҳои энергияи сабз хусусан НБО-и Роғун, таъсиси корхонаҳои муштарак ва ҳалли дигар масъалаҳои ҷойдошта изҳори омодагӣ намуданд.