Мулоқот бо Сафири Иёлоти Муттаҳидаи Америка дар Тоҷикистон

Санаи 21 июни соли ҷорӣ раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Раҳимзода Султон бо Сафири фавқулодда ва мухтори Иёлоти Муттаҳидаи Америка дар Тоҷикистон Мануэл Микаллер вохӯрӣ намуд.
Зимни вохӯрӣ вазъи кунунӣ ва густариш додани ҳамкорӣ байни Кумитаи давлатии сармоягузорӣ ва идораи амволи давлатӣ ва сохторҳои дахлдор, аз ҷумла Палатаи савдои Иёлоти Муттаҳидаи Америка дар Тоҷикистон, Шӯрои тиҷоратии Тоҷикистону Иёлоти Муттаҳидаи Америка, инчунин омодагӣ ба сафари ҳайати соҳибкорони амрикоӣ ба Тоҷикистон ва ғайраҳо мавриди муҳокима қарор дода шуд.
Мавриди зикр аст, ки ҷиҳати ҷалби бештари сармояи хориҷӣ, хусусан сармояи мустақими хориҷӣ, ба иқтисоди миллӣ, ҳамкорӣ бо сохторҳои болозикр тақвият ёфта истодаанд. Бо ин мақсад рӯзҳои наздик ҳайати соҳибкорони амрикоӣ таҳти роҳбарии директори иҷроияи Шӯрои тиҷоратии Тоҷикистону Иёлоти Муттаҳидаи Америка ба Тоҷикистон ҷиҳати шиносоӣ аз фазо ва имкониятҳои сармоягузорӣ, фаъолияти соҳибкорӣ ва лоиҳаҳои афзалиятнок ташриф меоранд.