Мулоқот бо ҳайати Шӯрои тиҷоратии Иёлоти Муттаҳидаи Америка

   Санаи 24 июни соли ҷорӣ дар меҳмонхонаи «Ҳайат Реҷенсӣ»-и шаҳри Душанбе субҳонаи кории раиси Кумитаи давлатии сармоягузорӣ ва идораи амволи давлатӣ бо роҳбарият ва ҳайати Шӯрои тиҷоратии Иёлоти Муттаҳидаи Америка – Тоҷикистон баргузор гардид.
   Ҳайати меҳмононро Раиси Кумитаи давлатии сармоягузорӣ ва идораи амволи давлатӣ пазироӣ намуда, ба онҳо оид ба талошҳои Ҳукумати Ҷумҳурии Тоҷикистон ҷиҳати фароҳам овардани фазои мусоиди сармоягузорӣ ва кафолату имтиёзҳои мавҷуда барои сармоягузорон маълумот ироа намуд.
Дар доираи мулоқот, инчунин самтҳои афзалиятноки иқтисоди миллӣ барои сармоягузорӣ мавриди баррасӣ қарор гирифта, дар натиҷа барои тақвияти ҳамкориҳои минбаъда дар самтҳои ҷалби сармояи мустақим ва таъсиси корхонаҳои муштарак, воридоти технологияҳои амрикоӣ ба Тоҷикистон ва ғайраҳо изҳори омодагӣ карда шуд.
   Сафари ҳайати болозикр қаблан бо мақсади тақвияти ҳамкориҳои иқтисодӣ, хусусан сармоягузорӣ, бо доираи соҳибкорони Иёлоти Муттаҳидаи Америка бо ташаббуси Кумитаи давлатии сармоягузорӣ ва идораи амволи давлатӣ ва Сафорати Ҷумҳурии Тоҷикистон дар Иёлоти Муттаҳидаи Америка ба нақша гирифта шуда буд.
   Дар доираи ташрифи ҳайати мазкур ба Тоҷикистон баргузории вохӯриҳо байни ҳайати Шӯрои тиҷоратии Иёлоти Муттаҳидаи Америка ва намояндагони Ҳукумати Ҷумҳурии Тоҷикистон, роҳбарияти вазорату идораҳои дахлдор, инчунин вохӯриҳои алоҳидаи ширкатҳои америкоӣ бо роҳбарияти вазорату идораҳо ва бахшҳои бонкдорву хусусӣ пешбинӣ шудааст.