Вохӯрӣ бо ҳайати Кумитаи дӯстии Парлумони Шоҳигарии Арабистони Саудӣ

Санаи 28 июни соли ҷорӣ вохӯрии раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Раҳимзода Султон бо ҳайати Кумитаи дӯстии Парлумони Шоҳигарии Арабистони Саудӣ таҳти роҳбарии доктор Муҳаммад ибни Абдулазиз ал-Ҷарбо баргузор гардид.

Зимни вохӯрӣ раиси Кумита ташрифи меҳмонони олиқадрро ба Тоҷикистон пазироӣ намуда, ба онҳо доир ба вазъи ҳамкориҳои иқтисодиву сармоягузории Тоҷикистону Шоҳигарии Арабистони Саудӣ маълумот доданд.

Ҳамзамон доир ба натиҷаи тавофуқҳои ҳосилшудаи ҳайати кишвар бо вазири сармоягузории Арабистони Саудӣ Халид Ал-Фалих, муовини якуми вазири саноат ва сарватҳои саъданӣ ва роҳбарияти ширкатҳои «ACWA POWER» ва «EXIM BANK»-и Арабистони Саудӣ (29-30 майи соли ҷорӣ) маълумот дода, қайд карданд, ки рӯзҳои наздик ҳайати соҳибкорони саудӣ ба Тоҷикистон ташриф меоранд.

Дар баробари ин, зимни вохӯрӣ имкониятҳои мавҷудаи сармоягузории Тоҷикистон дар самтҳои афзалиятнок хусусан саноат, кишоварзӣ, энергетика, сайёҳӣ ва ғайраҳо ба меҳмонон муаррифӣ, таъсиси корхонаҳои муштарак дар Тоҷикистон ва содироти маҳсулоти кишоварзӣ ба Шоҳигарии Арабистони Саудӣ, баргузории ҷаласаи навбатии комиссияи байниҳукуматӣ, созишномаи ҳифзи мутақобилаи сармоягузорӣ ва ғайраҳо мавриди баррасӣ қарор дода шуданд.