Русский
English
Санаи 14 ноябри соли 2024 дар меҳмонхонаи “Ҳаят Реҷенсӣ” аз ҷониби Кумитаи давлатии сармоягузорӣ ва идораи амволи давлатӣ дар ҳамкорӣ бо Иттифоқи рушди бахши хусусии Тоҷикистон бо иштироки муовини Сарвазири Ҷумҳурии Тоҷикистон муҳтарам Дилрабо Мансурӣ, роҳбарияти вазорату идораҳо, шарикони рушд, ассотcиатсияҳо, бонкҳо ва соҳибкорзанон Форуми байналмилалӣ таҳти унвони “Занон дар соҳибкорӣ” баргузор карда шуд.
Форумро муовини Сарвазири Ҷумҳурии Тоҷикистон ҳусни оғоз бахшида, баъдан роҳбарияти Кумитаи давлатии сармоягузорӣ ва идораи амволи давлатӣ, Вазорати саноат ва технологияҳои нав, Агентии инноватсия ва технологияҳои рақамии назди Президенти Ҷумҳурии Тоҷикистон, Кумитаи кор бо занон ва оилаи назди Ҳукумати Ҷумҳурии Тоҷикистон ва намояндаи Агентии Амрико оид ба рушди байналмилалӣ дар Тоҷикистон (USAID) суханронӣ намуданд.
Қайд карда шуд, ки маҳз бо дастгириҳои бевосита ва таваҷҷӯҳи хосаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар соҳаҳои гуногуни иқтисодиёт як қатор ислоҳоти самаранок татбиқ шудааст, ки он бевосита барои занони соҳибкор ҷиҳати пешбурд ва рушди фаъолияти соҳибкорӣ дар саросари кишвар мусоидат менамояд.
Тавассути дастгириҳои Ҳукумати ҷумҳурӣ ҳиссаи фаъолияти занон дар соҳаҳои гуногуни иқтисоди кишвар дар ҳоли афзоиш қарор дошта, ҷиҳати дастгирии занони ҳунарманду эҷодкор пайваста тадбирҳои ҳадафманд андешида мешавад.
Инчунин, пеш аз оғози Форум иштирокиён аз Намоишгоҳи молу маҳсулот ва хизматрасониҳои занони соҳибкор дидан намуданд.
Дар Форум беш аз 150 нафар, аз ҷумла соҳибкорзанони Ҷумҳурии Қазоқистон, Ӯзбекистон ва Қирғизистон иштирок намуданд.
Пас аз қисмати расмии Форум, кори чорабинӣ дар се панел дар мавзуи “Нақши давлат дар рушди соҳибкории занон”, “Саҳми бонувон дар рушди истеҳсолот ва хизматрасонӣ” ва “Имкониятҳо ва дастгирии техникии занон дар фаъолияти соҳибкорӣ” давом ёфта, дар фарҷом тарафҳо ба ифоқа расиданд, ки чунин чорабиниҳои соҳибкориро мунтазам баргузор хоҳанд намуд.
948 