Русский
English
Санаи 18-уми ноябри соли 2024 дар доираи сафари кории ҳайати кишвар ҷиҳати тавсеа ва таҳкими ҳамкориҳои дуҷонибаи Ҷумҳурии Тоҷикистон бо кишварҳои Осиёи Ҷанубу Шарқӣ мулоқоти раиси Кумитаи давлатии сармоягузорӣ ва идораи амволи давлатӣ Султон Раҳимзода ва вазири саноат ва технологияҳои нави Ҷумҳурии Тоҷикистон бо муовини Сарвазири Малайзия ҷаноби Юсуф Фадиллаҳ баргузор гардид.
Дар мулоқот доираи васеи масъалаҳои густариши ҳамкориҳои сармоягузорӣ, иқтисодию тиҷоратӣ, инчунин дигар масъалаҳои муҳими ҳамкории ду кишвар ва татбиқи лоиҳаҳои муштарак мавриди муҳокима қарор гирифтанд.
Ҷонибҳо ҳавасмандиро барои густариши ҳамкориҳои сармоягузориву тиҷоратӣ, таъсиси платформаҳои муштарак барои содирот ва воридот, инчунин ҷалби сармоя ба соҳаҳои афзалиятноки кишвар ба монанди энергетика, кишоварзӣ ва дигар соҳаҳои инфрасохторӣ иброз намуданд.
Маврид ба зикр аст, ки ҳайати Ҷумҳурии Тоҷикистон аз 17-26-уми ноябр таҳти роҳбарии раиси Кумитаи давлатии сармоягузорӣ ва идораи амволи давлатӣ Султон Раҳимзода, вазири саноат ва технологияҳои нав Шералӣ Кабир ва намояндагони вазорату идораҳои дигари ҷумҳурӣ ҷиҳати тавсеа ва таҳкими ҳамкориҳои дуҷонибаи Ҷумҳурии Тоҷикистон бо кишварҳои Осиёи Ҷанубу Шарқӣ, аз ҷумла ба давлатҳои Малайзия, Индонезия, Сингапур ва Тайланд сафари корӣ анҷом медиҳанд.
955 