Рӯзи Парчами давлатии Ҷумҳурии Тоҷикистон

Санаи 22 ноябри соли 2024 дар Кумитаи давлатии сармоягузорӣ ва идораи амволи давлатӣ бахшида ба Рӯзи Парчами давлатии Ҷумҳурии Тоҷикистон ҷаласаи тантанавӣ баргузор гардид.

Дар оғози чорабинӣ нахуст Суруди миллии Ҷумҳурии Тоҷикистон садо дода шуда, сипас муовини якуми раиси Кумита Юсуфзода Фаррух кормандони дастгоҳи марказӣ ва ташкилотҳои системаи Кумитаи давлатии сармоягузорӣ ва идораи амволи давлатиро бо ин рӯзи таърихиву пурифтихор табрик намуд.

Қайд гардид, ки Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон рангҳои парчами миллиро “Ифодагари роҳи таърихии халқи Тоҷикистон ва баёнгари арзишҳои фарҳанги миллӣ ва сиёсӣ” дониста, қайд намуданд: Ранги сурх – рамзи муборизаву ҷоннисории халқ барои озодӣ ва истиқлол, ранги сафед – нишони бахту саодат, умеду орзу ва ранги сабз – нишонаи сарсабзиву шукуфоӣ, сарбаландиву хуррамӣ ва абадият мебошад. Дар байни парчам тасвири тоҷ ва ҳафт ахтар ҷой гирифтааст, ки он ишора ба решаҳои таърихии давлатдории Тоҷикистони соҳибистиқлол мебошад.

Парчами давлатӣ ҳамчун муқаддастарин рамзи давлатдории мо баёнгари ҳувият, таърих ва моҳияти давлати тоҷикон, далели возеҳи соҳибватаниву соҳибистиқлолии, нишонаи таъриху фарҳанги бостониву пурғановати миллати тоҷик буда, ҳар як фарди ҷомеаро вазифадор менамояд, ки нисбат ба ин рамзи муқаддаси миллӣ эҳтиром ва арҷ гузорад.

Парчами давлатӣ рамзест, ки қудрати муттаҳидкунанда дорад ва дар қалби ҳар як шаҳрванд ғурури миллӣ ва эҳсоси гарми ватандориро бедор месозад. Бинобар ин, ҳифзи Парчам ва арҷгузорӣ ба он нишонаи ҳисси баланди миллӣ ва ватандӯстиву ватанпарастӣ мебошад.

Дар чорабинӣ, инчунин як қатор кормандони Кумита вобаста ба таърихи парчамдории халқи тоҷик, таърихи қабул, моҳият ва гиромидошти он ҳамчун муқаддасоти миллӣ маъруза намуданд.