Мулоқоти муовини якуми Сарвазири Ҷумҳурии Тоҷикистон бо Президенти Бонки Исломии Рушд

Санаи 24-уми ноябр дар шаҳри Риёз дар ҳошияи сафари ҳайати Ҷумҳурии Тоҷикистон ба Шоҳигарии Арабистони Саудӣ мулоқоти муовини якуми Сарвазири Ҷумҳурии Тоҷикистон Холиқзода Ҳоким Ҳикматулло бо Президенти Бонки Исломии Рушд доктор Муҳаммад Сулаймон Ал-Ҷассер баргузор гардид.
Дар мулоқот масъалаҳои ҳамкории имрӯза ва дурнамои равобити Тоҷикистон бо ин ташкилоти бонуфузи молиявӣ баррасӣ карда шуда, аз рушди ҳамкории созандаи дуҷониба дар самти татбиқи як қатор лоиҳаҳои афзалиятноки соҳаҳои маориф, тандурустӣ, энергетика, нақлиёт, обёрӣ ва заминсозӣ изҳори қаноатмандӣ гардид.
Таъкид гардид, ки аз оғози ҳамкорӣ бо Бонки Исломии Рушд маблағи зиёда аз 916 миллион доллари амрикоӣ барои татбиқи лоиҳаҳои афзалиятнок дар Ҷумҳурии Тоҷикистон равона гардидааст. Айни ҳол, дар кишвар ба маблағи зиёда аз 237 миллион доллари амрикоӣ 7 лоиҳаи сармоягузорӣ дар соҳаҳои энергетика, нақлиёт, обёрии заминҳо, маориф ва тандурустӣ амалӣ шуда истодааст.
Ҳамзамон бо ин, ҷонибҳо алоқамандии худро ҷиҳати тақвияти ҳамкорӣ дар дигар самтҳои муҳими таъмини рушди кишвар, аз қабили саноату кишоварзӣ, энергетика, рақамикунонӣ, рушди инфрасохтори шаҳрӣ, алалхусус низоми таъминоти оби ошомиданӣ, хоҷагии манзилию коммуналӣ, таҷдиди роҳҳои мошингард ва табдил додани онҳо ба роҳҳои муосири байналмилалӣ иброз намуданд.
Дар фарҷом аз ҷониби муовини якуми Сарвазири Ҷумҳурии Тоҷикистон Холиқзода Ҳоким Ҳикматулло ба Президенти Бонки Исломии Рушд доктор Муҳаммад Сулаймон Ал-Ҷассер мукофоти давлатии Ҷумҳурии Тоҷикистон ордени “Дустӣ” барои саҳми арзанда дар рушди ҳамкориҳои дуҷониба супорида шуд.
Президенти Бонки Исломии Рушд Муҳаммад Сулаймон Ал-Ҷассер миннатдорӣ ва самимияти худро ба Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои қадрдонӣ бо ин мукофоти давлатӣ баён намуд.