Мулоқоти муовини якуми Сарвазири Ҷумҳурии Тоҷикистон Директори Фонди Саудии Рушд

Санаи 24 ноябр дар шаҳри Риёз дар ҳошияи иштироки ҳайати кишвар дар 28-умин Конфронси байналмилалии сармоягузорӣ мулоқоти муовини якуми Сарвазири Ҷумҳурии Тоҷикистон Холиқзода Ҳоким Ҳикматулло бо директори Фонди Саудии Рушд Султон Ал – Маршад баргузор гардид.
Дар мулоқот ҳолати кунунӣ ва дурнамои равобити Тоҷикистон бо Фонди Саудии Рушд баррасӣ карда шуда, аз рушди ҳамкории созандаи дуҷониба дар татбиқи як қатор лоиҳаҳои афзалиятноки соҳаҳои маориф, тандурустӣ, энергетика, нақлиёт ва обёрӣ изҳори қаноатмандӣ гардид.
Таъкид гардид, ки дар солҳои ҳамкорӣ бо Ҷумҳурии Тоҷикистон Фонди Саудии Рушд ҷиҳати татбиқи лоиҳаҳои мухталифи сармоягузорӣ 296,7 млн доллари ИМАҷудо намудааст. Айни замон, бо дастгирии Фонди мазкур 3 лоиҳа ба маблағи умумии 145,0 млн. доллари ИМА дар соҳаҳои маориф, ирригатсия ва энергетика мавриди татбиқ қарор доранд.
Зимни мулоқот, ҷонибҳо алоқамандии худро ҷиҳати тақвияти ҳамкорӣ дар дигар самтҳои муҳими таъмини рушди кишвар, аз қабили саноату кишоварзӣ, энергетика, рақамикунонӣ, рушди инфрасохтори шаҳрӣ, алалхусус низоми таъминоти оби ошомиданӣ, хоҷагии манзилию коммуналӣ, таҷдиди роҳҳои мошингард ва табдил додани онҳо ба роҳҳои муосири байналмилалӣ иброз намуданд.
Муовини якуми Сарвазири Ҷумҳурии Тоҷикистон Холиқзода Ҳоким Ҳикматулло ба Директори Фонди саудии рушд Султон Ал – Маршад барои ҳамкории судманд ва дастгирии лоиҳаҳои инфрасохтории Ҷумҳурии Тоҷикистон ибрози сипос намуда, номбурдаро барои ташриф ба Тоҷикистон даъват намуд.