Маросими баимзорасонии Созишномаи сармоягузорӣ

Санаи 4-уми  феврали соли 2025 дар Кумитаи давлатии сармоягузорӣ ва идораи амволи давлатии Ҷумҳурии Тоҷикистон Созишномаи иловагӣ ба Созишномаи сармоягузорӣ байни Ҳукумати Ҷумҳурии Тоҷикистон ва Консорсиуми сармоягузорон дар ҳайати ҶДММ «Авесто Гурӯҳ», ҶСК «Тоҷикгидроэлектромонтаж» ва ҶДММ Ташкилоти амонатии қарзии хурди «Душанбе Сити» дар бораи амалӣ кардани лоиҳаи «Низоми автоматикунонидашудаи назорат ва баҳисобгирии нерӯи барқ дар шаҳри душанбе» аз 12-уми декабри соли 2019» ба имзо расонида шуд.

Мақсад аз имзои Созишномаи иловагӣ ин идомаи ислоҳот ва рушди низоми энергетикии кишвар тавассути ҷорӣ намудани технологияҳои муосир дар раванди баҳисобгирӣ ва назорати истифодаи нерӯи барқ ба ҳисоб меравад.

Консорсиуми сармоягузорон тасмим гирифтаанд, ки бо ҷалби сармоягузорӣ дар ҳаҷми 73,0 млн доллари амрикоӣ, марҳилаи дуюми Лоиҳаи "Низоми автоматикунонидашудаи назорат ва баҳисобгирии нерӯи барқ дар шаҳри Душанбе"-ро бо ҷалби беш 600 нафар кормандони маҳаллӣ амалӣ намояд.

Бояд қайд намуд, ки дар доираи марҳилаи якуми лоиҳа 140 ҳазор адад ҳисобкунакҳои барқӣ дар ноҳияи Синои шаҳри Душанбе насб карда шуда, ба коҳиш додани сатҳи талафоти нерӯи барқ дар ин минтақа мусоидат намуд.

Марҳилаи дуюми лоиҳа иловатан 16 шаҳру ноҳияҳоро дар баргирифта, насби зиёда аз 471 ҳазор адад ҳисобкунакҳо пешбинӣ мегардад.

Иқдоми пешгирифта дар самти таъмини истиқлолияти энергетикӣ ва истифодаи самарабахши нерӯи барқи мамлакат,  мувофиқ мебошад.