НИШАСТИ матбуотии Кумитаи давлатии сармоягузорӣ ва идораи амволи давлатӣ оид ба ҷамъбасти натиҷаҳои фаъолият дар соли 2024

Имрӯз, 11-уми феврали соли 2025 дар Кумитаи давлатии сармоягузорӣ ва идораи амволи давлатӣ бо иштироки роҳбарияти Кумита, намояндаи Дастгоҳи иҷроияи Президенти Ҷумҳурии Тоҷикистон, роҳбарони марказҳои татбиқи лоиҳаҳои сармоягузорӣ, раёсату шуъбаҳои дастгоҳи марказӣ, ташкилотҳои системаи Кумита ва намояндагони васоити ахбори омма нишасти матбуотӣ оид ба ҷаъбасти натиҷаҳои фаъолият дар соли 2024 баргузор гардид.

Нахуст, дар назди намояндагони васоити ахбори омма аз ҷониби раиси Кумита Раҳимзода Султон Нурмаҳмадпур вобаста ба ҷамъбасти натиҷаҳои фаъолияти Кумита дар  соли 2024, аз ҷумла, раванди татбиқи ислоҳоти иқтисодӣ ҷиҳати беҳтар намудани фазои сармоягузорӣ, ҷалби сармояи хориҷӣ, татбиқи саривақтию самараноки лоиҳаҳои сармоягузории давлатӣ, дастгирии давлатии соҳибкорӣ ва истифодаи самараноки моликияти давлатӣ маълумот дода шуд.

Сипас, аз ҷониби роҳбарияти Кумита ба саволҳои намояндагони воситаҳои ахбори омма оид ба ҷалби сармояи мустақим ба иқтисодиёти кишвар,  идораи самараноки моликияти давлатӣ, хусусигардонии амволи давлатӣ, таҳкими қонунгузорӣ дар самти соҳибкорию сармоягузорӣ, баланд бардоштани маърифати ҳуқуқиву молиявии соҳибкорону сармоягузорон, маълумоти оморӣ дар самти таъсис ва барҳамхурии субъектҳои соҳибкорӣ бо сурат гирифтани суҳбати ошкору возеҳ посухҳои мушаххас дода шуд.

Дар охир раисикунанда ба намояндагони воситаҳои ахбори омма ҷиҳати ҳамкориҳои судманди доимиашон дар самти ташвиқу тарғиби имкониятҳои сармоягузории кишвар изҳори миннатдорӣ баён намуда, зикр гардид, ки чорабинии имрӯза барои таъмини шаффофияти фаъолияти Кумита ва ҳамкориҳои сермаҳсули минбаъда мусоидат хоҳад кард.