Русский
English
Имрӯз, 8 апрели соли 2025, мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо Директори генералии Фонди рушди Абу-Даби (ADFD), Муҳаммад Саиф Ал Сувайдӣ, баргузор гардид.
Дар ин вохӯрӣ масъалаи ҷалби сармоя барои идомаи сохтмони Неругоҳи барқи обии Роғун мавриди баррасӣ қарор гирифт. Раиси кумита имкониятҳои васеи энергетикии Тоҷикистонро, бахусус дар соҳаи энержии сабз, муаррифӣ намуда, аз ADFD даъват ба амал овард, ки дар татбиқи лоиҳаи НБО Роғун ва дигар лоиҳаҳои инфрасохторӣ сармоягузорӣ намояд.
Ҷаноби Ал Сувайдӣ аз ҳамкории дуҷониба изҳори қаноатмандӣ намуда, омодагии ADFD-ро барои баррасии имкониятҳои сармоягузорӣ дар соҳаҳои афзалиятноки Тоҷикистон, аз ҷумла энергетика, таъкид кард. Ӯ зикр намуд, ки Фонди рушди Абу-Даби таҷрибаи ғанӣ дар маблағгузории лоиҳаҳои инфрасохторӣ дар кишварҳои гуногун дорад ва мехоҳад ин ҳамкориро бо Тоҷикистон густариш диҳад.
НБО Роғун, ки дар рӯдхонаи Вахш сохта мешавад, пас аз анҷом ёфтан бо иқтидори 3,600 мегаватт, бузургтарин неругоҳи барқи обӣ дар Осиёи Марказӣ хоҳад шуд. Ин неругоҳ на танҳо талаботи дохилии Тоҷикистонро бо неруи барқ таъмин мекунад, балки имконияти содироти неруи барқ ба кишварҳои ҳамсояро низ фароҳам меорад.
Мулоқоти имрӯза қадами муҳиме дар таҳкими ҳамкориҳои иқтисодӣ ва ҷалби сармоягузориҳои хориҷӣ барои татбиқи лоиҳаҳои стратегии Тоҷикистон, аз ҷумла НБО Роғун, ба ҳисоб меравад.
250 