Русский
English
Имрӯз, дар толори меҳмонхонаи Шероз Гранд Хотел дар ҳошияи ҷаласаи 17-уми Комиссияи мушатарки байниҳукуматии Тоҷикистону Эрон бо иштироки намояндагони вазорату идораҳои ҳарду кишвар ва намояндагони бахши хусусии Тоҷикистону Эрон Форуми сармоягузориву соҳибкории Тоҷикистону Эрон баргузор карда шуд.
Дар чорабинии мазкур Муовини якуми Раиси Кумитаи давлатии сармоягузорӣ ва идораи амволи давлатӣ Фаррух Юсуфзода ва Устондори Устони Форси Ҷумҳурии Исломии Эрон суханронӣ намуда, вобаста ба вазъи кунунӣ ва дурнамои густариши ҳамкориҳои иқтисодиву сармоягузорӣ байни Тоҷикистону Эрон гузориш доданд.
Зимни суханронии худ, Муовини якуми Раиси Кумитаи давлатии сармоягузорӣ ва идораи амволи давлатӣ имконоти сармоягузории кишварро муаррифӣ намуда, қайд намуд, ки Ҳукумати Ҷумҳурии Тоҷикистон зери сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мунтазам барои беҳтар намудани фазои сармоягузорӣ, рушди бахши хусусӣ ва дастгирии соҳибкорӣ ислоҳоти зарурӣ амалӣ менамояд.
Ислоҳоти роҳандозигардида барои соҳибкорону сармоягузорон як қатор имтиёзу сабукиҳои андозиву гумрукӣ, кафолатҳои қонунӣ ва бартариятҳои соҳавиро пешбинӣ менамояд.
Дар ин робита аз соҳибкорону сармоягузорони эронӣ даъват ба амал оварда шуд, ки дар соҳаҳои гуногуни иқтисоди Тоҷикистон сармоягузорӣ намуда, аз ин имтиёзҳо баҳравар гарданд ва барои густариши ҳамкориҳо саҳмгузор бошанд.
57 