Мулоқоти раиси Кумитаи давлатии сармоягузорӣ ва идораи амволи давлатӣ бо намояндагони Бонки Ҷаҳонӣ

Санаи 16-уми сентябри соли ҷорӣ дар шаҳри Душанбе вохӯрии раиси Кумитаи давлатии сармоягузорӣ ва идораи амволи давлатӣ Ҷумҳурии Тоҷикистон Султон Раҳимзода бо ҳайати намояндагони Бонки Ҷаҳонӣ баргузор гардид.

Зимни мулоқот ҷонибҳо атрофи масъалаҳои вобаста ба татбиқи минбаъдаи лоиҳаи нави «Экосистема барои стартапҳо бо мақсади рушди иқтисод» табодули афкор намуданд. Лоиҳаи мазкур ба рушди иқтидори соҳибкорони нав, густариши муҳити инноватсионӣ ва ҷалби сармояи хусусӣ ба бахшҳои афзалиятноки иқтисоди миллӣ равона шудааст.

Султон Раҳимзода дар ҷараёни вохӯрӣ аз ҳамкориҳои судманд бо Бонки Ҷаҳонӣ изҳори қаноатмандӣ намуда, таъкид дошт, ки татбиқи лоиҳаҳои муштарак имкониятҳои нави рушди соҳибкорӣ ва дастгирии иқдомҳои онҳоро фароҳам месозад.

Ҳайати Бонки Ҷаҳонӣ омодагии худро ҷиҳати тақвияти ҳамкорӣ ва мусоидат дар самти татбиқи пурраи лоиҳаи мазкур иброз дошта, зикр намуданд, ки Ҷумҳурии Тоҷикистон дорои иқтидори бузурги рушд дар соҳаи технологияҳои нав ва соҳибкории инноватсионӣ мебошад.

Дар анҷоми мулоқот ҷонибҳо барои идомаи ҳамкориҳои мутақобилан судманд ва густариши робитаҳои шарикӣ изҳори умедворӣ намуданд.