Чорабинии тантанавӣ ба ифтихори 31-умин солгарди қабули Конститутсияи Ҷумҳурии Тоҷикистон

Дар Кумитаи давлатии сармоягузорӣ ва идораи амволи Ҷумҳурии Тоҷикистон бо иштироки роҳбарият, сардорон ва кормандони воҳидҳои сохтори дастгоҳи марказӣ ва ташкилотҳои системаи Кумита бахшида ба 31-умин солгарди  Қабули Конститутсияи Ҷумҳурии Тоҷикистон чорабинии тантанавӣ баргузор гардид.

Раиси Кумита Султон Раҳимзода ҳайати роҳбарият ва кормандони дастгоҳи марказӣ ва ташкилотҳои зертобеи Кумитаро ба муносибати Рӯзи Конститутсияи Ҷумҳурии Тоҷикистон табрику муборакбод намуда, қайд намуд, ки қабули Конститутсияи Ҷумҳурии Тоҷикистон таҳти роҳбарии хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оғози марҳилаи наву сарнавиштсоз дар таърихи давлатдории миллии тоҷикон гардид.

Ин санади муҳими сиёсиву ҳуқуқӣ ба сифати Қонуни асосии кишвар, пояҳои устувори давлатдории миллӣ ва ҷомеаи ҳуқуқбунёдро барқарор намуда, кафолати волоияти қонун, адолати иҷтимоӣ ва ҳимояи ҳуқуқу озодиҳои инсон ва шаҳрвандро таъмин намуд.

Ҳамзамон, аз ҷониби кормандони Кумита вобаста ба нақши  Конститутсия дар ташаккули давлатдории миллӣ маъруза карда шуд.

Дар доираи чорабинӣ, аз ҷониби роҳбарияти Кумита як қатор кормандоне, ки дар фаъолияташон ба натиҷаҳои назаррас ноил гардида, инчунин дар баргузории Форуми байналмилалии сармоягузории Душанбе Инвест-2025 саҳми худро расонидаанд бо сипоснома қадрдонӣ карда шуданд.