Баргузории чорабинии тантанавӣ бахшида ба Рӯзи Парчами давлатии Ҷумҳурии Тоҷикистон

Санаи 24-уми ноябр дар Кумитаи давлатии сармоягузорӣ ва идораи амволи давлатӣ чорабинии тантанавӣ бахшида ба Рӯзи Парчами давлатии Ҷумҳурии Тоҷикистон баргузор гардид.

Дар оғоз раиси Кумита Султон Раҳимзода ҳайати кормандони Кумитаро ба Рӯзи Парчами давлатии Ҷумҳурии Тоҷикистон табрику муборакбод намуда, қайд намуд, ки имрӯз дар фазои соҳибистиқлолӣ ва таҳти сиёсати бунёдкоронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Парчами давлатии Ҷумҳурии Тоҷикистон ҳамчун нерӯи муттаҳидсозанда ҳар шаҳрванди кишварро ба ифтихор аз давлату давлатдорӣ, таҳкими пояҳои истиқлолияти миллӣ, ҳифзи арзишҳои он ва ҷидду ҷаҳди ҳамешагӣ дар роҳи ободиву суботи кишвар ҳидоят менамояд.

Парчам ва суннати парчамдорӣ дар давлатдории халқи тоҷик аз умқи ҳазорсолаҳо сарчашма гирифта, дар ҳама лаҳзаҳои пуршарафу тақдирсози миллат ҷойгоҳи худро дошт ва инъикоскунандаи ҳуввияти миллӣ, рамзи ягонагиву худшиносии давлатдорӣ ва ифодаи иродаи сарбаландонаи халқи тоҷик шинохта шудааст.

Дар шароити ниҳоят мураккабу ҳассоси замони муосир ва равандҳои босуръати ҷаҳонишавӣ, масъалаҳои ҳифзи истиқлол, суботу оромӣ, муқаддасоту арзишҳо, анъанаҳо ва расму ойинҳои миллӣ барои мо аҳамияти рузафзун пайдо карда истодаанд.

Аз ин рӯ, барои ҳар як шаҳрванди худогоҳу соҳибмаърифат муҳим аст, ки ба Парчами миллӣ эҳтиром гузорад, зеро донистани қадру манзалати рамзҳои давлатӣ ва муқаддасоти миллӣ маънии пос доштани ин сарзамин, гузаштаи таърихии он ва ҳифзу гиромидошти арзишҳои муқаддаси Истиқлолияти давлатиро дорад.

Ҳамзамон, аз ҷониби кормандони Кумита дар мавзӯи “Таърихи пайдоиш, ташаккул ва моҳияти сиёии Парчами давлатии Ҷумҳурии Тоҷикистон” маъруза карда шуд.