Баимзорасонии созишномаи шарикии давлат ва бахши хусусӣ

Санаи 23-юми феврали соли 2026 дар Кумитаи давлатии сармоягузорӣ ва идораи амволи давлатӣ маросими баимзорасонии созишномаи шарикии давлат ва бахши хусусӣ оид ба амалишавии лоиҳаи «Рушди низоми почтаи Тоҷикистон: низоми автоматикунонии раванди муросилоти почтавӣ» байни Хадамоти алоқаи назди Ҳукумати Ҷумҳурии Тоҷикистон ва Ҷамъияти дорои масъулияти маҳдуди «Сервис и Технология» баргузор гардид.

Лоиҳаи «Рушди низоми почтаи Тоҷикистон: автоматикунонии раванди муросилоти почтавӣ» ба ҷорӣ намудани низоми муосири автоматикунонии раванди муросилоти почтавӣ равона гардида, ба такмили соҳа, баланд бардоштани сифати хизматрасонӣ ва таъмини шаҳрвандон бо усулҳои нави муросилоти почтавӣ, хизматрасониҳои логистикӣ ва иҷрои фармоишҳо нигаронида шудааст.

Рушди соҳаи почта тавассути татбиқи технологияҳои рақамӣ ва савдои электронӣ метавонад ба рушди устувори иқтисодии кишвар саҳми назаррас гузорад.

Ҳаҷми сармоягузорӣ лоиҳа 5 млн доллари ИМА-ро ташкил медиҳад, ки маблағгузории пурраи он аз ҳисоби сармоягузории шарики хусусӣ ҶДММ «Сервис и Технология» таъмин мегардад.

Бояд қайд кард, ки дар доираи амалишавии лоиҳа беш аз 150 нафар бо ҷойи кори доимӣ таъмин гардида, беш аз 500 нафар кормандони фаъолиятдошта дар соҳаи алоқаи почта ҷалб карда мешаванд.