Рушди ҳамкориҳо ва баррасии имкониятҳои сармоягузорӣ дар Тоҷикистон

Нимаи дуюми рӯзи 15 апрел раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо кордори Сафорати Штатҳои Муттаҳидаи Амрико дар Тоҷикистон хонум Карсон Релитс Рокер, инчунин бо сафирони навтаъйини Ҷумҳурии Арабии Миср ҷаноби Тамер Фатҳӣ Абдуссалом Ҳаммад ва Ҷумҳурии Италия ҷаноби Гвидо Де Санктис мулоқот анҷом дод.

Зимни мулоқот ҷонибҳо масъалаҳои марбут ба густариши ҳамкориҳои иқтисодиву тиҷоратӣ, ҷалби сармояи хориҷӣ, беҳтар намудани фазои сармоягузорӣ ва истифодаи самараноки имкониятҳои мавҷударо мавриди баррасӣ қарор доданд.

Ҳамчунин, таваҷҷуҳи махсус ба тақвияти ҳамкориҳо дар соҳаҳои афзалиятнок, аз ҷумла энергетика, саноат, кишоварзӣ, сайёҳӣ ва рушди инфрасохтор зоҳир гардида, ҷонибҳо омодагии худро ҷиҳати рушди минбаъдаи муносибатҳои дуҷониба ва татбиқи лоиҳаҳои муштарак иброз намуданд.

Дар фарҷоми мулоқот таъкид гардид, ки истифодаи васеи имкониятҳои сармоягузорӣ ва тавсеаи ҳамкориҳои мутақобилан судманд ба рушди устувори иқтисоди миллӣ ва таҳкими равобити байналмилалии Ҷумҳурии Тоҷикистон мусоидат хоҳад кард.