Вохурӣ бо ҳайати сармоягузорон ва коршиносони байналмилалӣ

Санаи 22-юми май, раиси Кумитаи давлатии сармоягузорӣ ва идораи амволи давлатӣ Султон Раҳимзода бо ҳайати намояндагони ширкатҳои байналмилалии молиявии “J.P.Morgan”, “Loomis Sayles&Company”, “Morgan Stanley Investment Management” ва “Global Evolution” вохурӣ намуд.

Зимни вохӯрӣ ҷонибҳо масъалаҳои марбут ба вазъи кунунии иқтисодиёти Ҷумҳурии Тоҷикистон, имкониятҳои сармоягузорӣ, рушди бахши хусусӣ, бозори молиявӣ ва ҷалби сармояи хориҷиро мавриди баррасӣ қарор доданд.

Раиси Кумита ба меҳмонон оид ба ислоҳоти иқтисодӣ, беҳтар гардидани фазои сармоягузорӣ, тадбирҳои андешидашуда ҷиҳати дастгирии соҳибкорӣ ва имкониятҳои мавҷуда барои сармоягузорони хориҷӣ маълумоти муфассал пешниҳод намуд.

Таъкид гардид, ки Ҳукумати Ҷумҳурии Тоҷикистон ба рушди ҳамкориҳо бо доираҳои байналмилалии молиявӣ ва сармоягузорон таваҷҷуҳи хосса зоҳир намуда, барои татбиқи лоиҳаҳои афзалиятнок дар соҳаҳои энергетика, саноат, инфрасохтор, иқтисоди рақамӣ ва “иқтисоди сабз” шароити мусоид фароҳам овардааст.

Дар навбати худ, намояндагони JP Morgan ва коршиносони байналмилалӣ ба имкониятҳои иқтисодии Ҷумҳурии Тоҷикистон таваҷҷуҳ зоҳир намуда, омодагии худро ҷиҳати таҳкими ҳамкориҳо ва омӯзиши имкониятҳои нави сармоягузорӣ иброз доштанд.

Дар анҷоми мулоқот ҷонибҳо ба идомаи муколамаи созанда ва густариши ҳамкориҳои минбаъда ҳавасмандии худро таъкид намуданд.