Маросими баимзорасонии созишномаҳои сармоягузорӣ

Санаи 4 июни соли 2026 дар Кумитаи давлатии сармоягузорӣ ва идораи амволи давлатӣ маросими баимзорасонии созишномаҳои сармоягузорӣ байни Ҳукумати Ҷумҳурии Тоҷикистон ва ҷамъиятҳои дорои масъулияти маҳдуди «Канзи Диёр» ва «ТВЕА Душанбе саноати кӯҳӣ» баргузор гардид.

Созишномаҳои сармоягузорӣ бо ҶДММ «Канзи Диёр» таъсис ва рушди корхонаҳои истихроҷ ва коркарди маъданҳо дар шаҳр Панҷакент ва бо ҶДММ «ТВЕА Душанбе саноати кӯҳӣ» татбиқи лоиҳаи сохтмони марҳилаи дуюми корхонаи истихроҷ ва коркарди тилло дар ҳудуди ноҳияи Айнии вилояти Суғдро пешбинӣ менамояд.

Ҳаҷми умумии сармоягузорӣ дар доираи созишномаи сармоягузорӣ бо ҶДММ «Канзи Диёр» 500 миллион сомониро ташкил дода, дар сурати зарурат имконияти афзоиши ҳаҷми сармоягузорӣ низ пешбинӣ шудааст. Мутобиқи созишнома, корхонаи муосири истихроҷ ва коркарди маъдан таъсис дода мешавад, ки фаъолияти он тамоми занҷираи истеҳсолиро аз истихроҷи ашёи хом то истеҳсоли маҳсулоти ниҳоии рақобатпазир дар бар мегирад. Дар доираи лоиҳа равандҳои бойгардонӣ, коркарди металлургӣ, аффинаж ва дигар марҳилаҳои технологӣ ба роҳ монда мешаванд.

Тибқи созишномаи сармоягузорӣ бо ҶДММ «ТВЕА Душанбе саноати кӯҳӣ» ҷалби беш аз 600 миллион сомонӣ сармоя пешбинӣ гардидааст.

Татбиқи пурраи лоиҳаҳои болозикр мазкур имкон медиҳад, ки зиёда аз 300 ҷойи кории нав таъсис дода шуда, аҳолии маҳаллӣ бо ҷойи кори доимӣ таъмин карда шавад.

Амалисозии лоиҳаҳо ҷиҳати татбиқи амалии «Стратегияи рушди саноат дар Ҷумҳурии Тоҷикистон барои давраи то соли 2030», «Стратегияи ҷалби сармоя ба Ҷумҳурии Тоҷикистон барои давраи то соли 2040» ва ҳадафи чоруми стратегии миллӣ — саноатикунонии босуръати кишвар, инчунин ҷалби сармояи дохилию хориҷӣ, рушди инфрасохтори истеҳсолию иҷтимоӣ, баланд бардоштани сатҳи даромад ва некуаҳволии аҳолӣ, воридоти технологияҳои муосир, афзоиши ҳаҷми содироти маҳсулоти ватанӣ ва таъсиси ҷойҳои нави корӣ мусоидат хоҳад кард.