Баррасии ҳамкориҳои сармоягузории Осиёи Марказӣ - Чин дар Остона

Санаи 16-уми июни соли 2025 раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода дар шаҳри Остонаи Ҷумҳурии Қазоқистон дар Форуми ҳамкориҳои саноатӣ ва сармоягузории “Чин – Осиёи Марказӣ” иштирок намуд.

Дар ҳамоиш намояндагони ҳукуматҳо, доираҳои тиҷоратӣ ва коршиносон аз кишварҳои минтақа гирд омада, масъалаҳои марбут ба рушду тавсеаи ҳамкорӣ дар самтҳои мубрам, аз қабили рақамикунонӣ, нақлиёту логистика, саноати кӯҳию металлургӣ, инчунин комплекси агросаноатиро баррасӣ намуданд.

Султон Раҳимзода зимни суханронии худ аҳамияти густариши шарикӣ дар бахши сармоягузориро таъкид намуда, ба рушди босуръати иқтисодиёти Тоҷикистон ва иқтидори он дар соҳаҳои энергетикаи “сабз”, саноати истихроҷу коркард, нақлиёту логистика, рақамикунонӣ кишоварзӣ ва сайёҳӣ ишора кард.

«Муколамаи имрӯза — имконияти нодирест барои татбиқи иқтидори муштарак ва таҳкими ҳамкории индустриалию сармоягузорӣ», — изҳор дошт hаиси Кумита.

Ҷумҳурии Мардумии Чин ҳамчун яке аз шарикони асосии иқтисодии Тоҷикистон боқӣ монда, ҳаҷми умумии сармоягузориҳо аз ҷониби Чин зиёда аз 5 миллиард доллари ИМА-ро ташкил медиҳад. Дар кишвар беш аз 700 ширкати дорои сармояи чинӣ фаъолият мекунанд.

Форум ба таҳкими эътимод, муаррифии лоиҳаҳои мушаххас ва рушди фазои нави шарикӣ дар минтақа мусоидат намуд.