Тоҷикӣ
English
Имрӯз, 17 июли соли 2023, дар шаҳри Душанбе таҳти роҳбарии раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодирзода Саъдӣ Сангинмурод ва Вазири саноат ва тиҷорати Ҷумҳурии Чехия Форуми сармоягузорӣ ва саноатии Тоҷикистону Чехия баргузор гардид.
Дар ҷаласа инчунин, роҳбарону масъулини мақомоти давлатӣ ва доираҳои соҳибкорию сармоягузории Тоҷикистону Чехия иштирок намуданд.
Зимни суханронӣ раиси Кумитаи давлатии сармоягузорӣ ва идораи амволи давлатӣ қайд намуд, ки баргузории чунин чорабиниҳо ба рушди ҳамкориҳои тиҷоративу иқтисодӣ, баланд бардоштани иқтидори содиротӣ, ҷалби сармоягузорӣ, воридоти технологияҳои муосир ва тақвияти ҳамкориҳои дуҷонибаи иқтисодӣ мусоидат менамояд.
Қайд гардид, ки ҳаҷми умумии сармоягузориҳои Чехия ба иқтисодиёти Ҷумҳурии Тоҷикистон беш аз 500 млн. сомониро ташкил медиҳад, ки аз он беш аз 80 млн. сомониро сармояи мустақим ташкил медиҳад.
Бо дарназардошти маҷудияти имкониятҳои васеи ҳамкорӣ ва мунтазам идома ёфтани татбиқи тадбирҳои ислоҳотӣ аз ҷониби Ҳукумати Ҷумҳурии Тоҷикистон аз доираҳои соҳибкорию сармоягузории дар чорабинӣ ҳузурдошта даъват ба амал оварда шуд, ки дар амалишавии лоиҳаҳои сармоягузорӣ ва тиҷоратӣ саҳм гузошта, барои ташкили корхонаҳои муштарак таваҷҷӯҳи бештар зоҳир намоянд.
Дар доираи Форум ба иштирокчиён фазо ва имкониятҳои сармоягузорӣ дар соҳаҳои саноат, энергетика, хизматрасонӣ, кишоварзӣ, сайёҳӣ, логистика ва нақлиёт муаррифӣ карда шуданд.
Пас аз ҷаласаи пленарӣ, вохӯрии дуҷонибаи соҳибкорони ду давлат дар шакли “Соҳибкор бо Соҳибкор” (В2В) баргузор гардида, санадҳои ҳамкорӣ дар самтҳои хизматрасонӣ, савдои дуҷониба, кишоварзӣ, тандурустӣ, нақлиёт ва саноати сабук мувофиқа гардиданд.
Иштирочиёни Форуми сармоягузориву саноатии Тоҷикистону Туркманистон ба рушди муносибатҳои дуҷониба ва ҳамкориҳои мутақобилан судманд, ки фарогири ҳамаи соҳаҳои иқтисодӣ мебошанд, баҳои баланд дода, ба мувофиқа расиданд, ки чунин ҳамоишҳои соҳибкорону сармоягузоронро мунтазам баргузор хоҳанд намуд.
1 413 