Мулоқот бо Гурӯҳи палатаҳои савдои Малайзия

Санаи 18-уми ноябри соли 2024 дар шаҳри Куала Лумпури Малайзия дар ҳошияи Форуми сармоягузории Тоҷикистону Малайзия мулоқоти ҳайати Ҷумҳурии Тоҷикистон бо роҳбарият ва аъзои Гурӯҳи палатаҳои савдои Малайзия баргузор гардид.

Зимни вохурӣ қайд гардид, ки Тоҷикистон бо мақсади роҳ ёфтан ба бозорҳои сармоя, технология ва маҳсулоти саноатӣ рушду таҳкими ҳамкориҳои мутақобилаи садмандро бо кишварҳои Осиёи Ҷанубу Шарқӣ аз самтҳои афзалиятнок меҳисобад.

Дар вохӯрӣ, инчунин вобаста ба масъалаҳои тақвияти ҳамкориҳои байни палатаҳои савдо ва саноати ду кишвар дар самти дастгирии тиҷорат ва амалиётҳои содиротиву воридотӣ, ба роҳ мондани ҳамкорӣ дар робита ба воридоту содироти маҳсулоти тамғаи "ҳалол" дар бозорҳои Тоҷикистону Малайзия, ҷалби сармоя ва ташкили корхонаҳои муштарак табодули афкор сурат гирифт.

Ҷонибҳо роҷеъ ба таҳкими робитаҳои тиҷоратию сармоягузорӣ ва ба роҳ мондани табодули сафарҳои тоҷирону сармоягузорон ҷиҳати омӯзиши имкониятҳои ҳамкорӣ дар бахшҳои гуногуни иқтисодиёт ба ифоқа расиданд.

Пас аз анҷоми мулоқот байни Палатаи савдо ва саноати Ҷумҳурии Тоҷикистон ва Палатаи савдои байналмилалии Малайзия Ёддошти тафоҳум оид ба ҳамкорӣ ба имзо расонида шуд.