Вохурӣ бо ҳайати Бонки Аврупоии Таҷдид ва Рушд

Санаи 17 апрели соли 2024 вохӯрии раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Раҳимзода Султон Нурмаҳмадпур бо ҳайати Бонки Аврупоии Таҷдид ва Рушд баргузор гардид.

          Зимни вохӯрӣ вазъи кунунӣ ва дурнамои густариши ҳамкорӣ бо Бонки Аврупоии Таҷдид ва Рушд, рафти амалишавии лоиҳаҳои сармоягузории давлатӣ ва лоиҳаҳои бо иштироки бахши хусусӣ, маблағгузории лоиҳаҳои нави афзалиятнок ва механизми татбиқи онҳо, табодули таҷриба дар самти маблағгузории лоиҳаҳои бахши хусусӣ ва ғайраҳо мавриди муҳокима қарор дода шуданд.

          Бонки Аврупоии Таҷдид ва Рушд дар таҳкими бахшҳои молиявӣ ва хусусӣ, соҳаҳои нақлиёт, энергетика, обтаъминкунӣ ва баланд бардоштани сатҳи хизматрасониҳои коммуналӣ дар ҷумҳурӣ нақши назаррас дошта, бо дастгирии молиявии бонк як қатор лоиҳаҳои сармоягузории давлатӣ ва бахши хусусӣ мавриди татбиқ қарор доранд.

          Аз натиҷаи вохурӣ ҷонибҳо барои ҷалби бештари сармояи бонк ба соҳаҳои афзалиятноки иқтисодиёти ҷумҳурӣ ва тақвияти бештари ҳамкориҳо дар самтҳои зикршуда изҳори омодагӣ намуданд.